តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កិច្ចចរចាជុំទី៧អំពីការវិលត្រឡប់ទៅធ្វើតាមផែនការសកម្មភាពរួមគ្នា និងទូលំទូលាយ (JCPO) ដោយសហរដ្ឋអាមេរិក និងប្រទេសអ៊ីរ៉ង់នោះ ត្រូវបានលើកទៅធ្វើនៅថ្ងៃក្រោយ កាលពីថ្ងៃទី១៧ខែធ្នូ។
លោក Jake Sullivan ទីប្រឹក្សាសន្តិសុខជាតិសហរដ្ឋអាមេរិកបាននិយាយថា ទោះជានៅពីរបីថ្ងៃចុងក្រោយមុនលើកពេលការចរចាគ្នានោះ «មានការជឿនលឿនខ្លះនៅឯតុចរចាក៏ដោយ» ក៏កិច្ចចរចានេះ «គ្មានដំណើរការល្អ ក្នុងន័យថា យើងមិនទាន់រកឃើញមាគ៌ាទៅកាន់រកផែនការសកម្មភាពរួមគ្នា និងទូលំទូលាយ (JCPO) ទេ»។
នៅមុនកិច្ចចរចាថ្មីៗបំផុតចាប់ផ្តើមកាលពីថ្ងៃទី២៩ ខែវិច្ឆិកា ពេលវេលា ៥ខែទំនេរចោលបណ្តាលមកពីការបោះឆ្នោតប្រធានាធិបតិនៅអ៊ីរ៉ង់។ នៅពេលប្រទេសអ៊ីរ៉ង់ វិលមកកាន់តុចរចាវិញ ប្រទេសនេះ បានដាក់សំណើដែលសើរើត្រឡប់ក្រោយវិញនូវការសម្របសម្រួលដែលអតីតរដ្ឋបាលអ៊ីរ៉ង់បានព្រមព្រៀងធ្វើ នាំឱ្យប្រទេសចំនួនបីនៅអឺរ៉ុប គឺប្រទេសបារាំង អាល្លឺម៉ង់ និងចក្រភពអង់គ្លេស ចោទរដ្ឋាភិបាលក្រុងតេហេរ៉ង់ថា គ្មានភាពប្រាកដប្រជា។
សហរដ្ឋអាមេរិក និងប្រទេសអឺរ៉ុបទាំងបីយល់ស្របគ្នាថា មានការជឿនលឿនខាងបច្ចេកទេសខ្លះ មិនយូរប៉ុន្មានមុនការលើកការប្រជុំកាលពីពេលថ្មីៗនេះ។ ពួកមន្ត្រីសហរដ្ឋអាមេរិក និងអឺរ៉ុបនិយាយថា នៅពេលនេះ យ៉ាងហោចណាស់ មានការយល់ឃើញដូចគ្នាអំពីអត្ថបទសំណើដែលនឹងធ្វើជាមូលដ្ឋានមួយសម្រាប់កិច្ចចរចាបន្ទាប់ៗទៀត។ តែលោក Sullivan បានបង្ហាញការស្រងាកចិត្តថា ការធ្វើឱ្យកម្មវិធីនុយក្លេអ៊ែរអ៊ីរ៉ង់«វិលមកក្នុងការប្រជុំចរចាវិញ មានការពិបាកជាងមុនក្នុងឆ្នាំ២០២១ គឺពិបាកជាងអ្វីដែលយើងចង់ឃើញ»។
អ្វីដែលនាំឱ្យភ្ញាក់ផ្អើល ជាពិសេសគឺថា ចាប់ពីឆ្នាំ២០១៩មក អ៊ីរ៉ង់បានពង្រីកកម្មវិធីនុយក្លេអ៊ែរលើសពីកំហិតនៃកម្មវិធីសកម្មភាព JCPOA។ អ៊ីរ៉ង់បានបន្សុទ្ធសារធាតុ អ៊ុយរ៉ានីញ៉ូមដល់កម្រិតសុទ្ធ៦០ ហើយបានកំហិតកិច្ចសហប្រតិបត្តិការជាមួយទីភ្នាក់ងារថាមពលបរិមាណូអន្តរជាតិ។
សហរដ្ឋអាមេរិក និងប្រទេសអឺរ៉ុបទាំងបី បានបង្ហាញកង្វល់យ៉ាងខ្លាំងថា ក្នុងពេលឆាប់ៗនេះ ការជឿនលឿនខាងនុយក្លេអ៊ែររបស់អ៊ីរ៉ង់ អាចនឹងឈានដល់ចំណុចដែល តាមពាក្យសម្តីរបស់ប្រទេសអឺរ៉ុបទាំងបីថា «ធ្វើឱ្យការចរចាលែងបានការ»។
ចំណុចល្អមួយនៅក្នុងកិច្ចចរចាកាលពីពេលថ្មីៗនេះគឺថា ប្រទេសទាំង៦ គឺសមាជិកអចិន្ត្រៃយ៍ក្រុមប្រឹក្សាសន្តិសុខអ.ស.ប.បូកនឹងប្រទេសមួយ រួមមានប្រទេសចិន និងរុស្ស៊ី បានរួបរួមគ្នាទទួលស្គាល់ និងបង្ហាញពី«ភាពបន្ទាន់នៃការធ្វើឱ្យមានកិច្ចព្រមព្រៀងគ្នាមួយ...។ មានការយល់ឃើញស្របគ្នាក្នុងចំណោមប្រទេសមហាអំណាចថា យើងត្រូវតែបញ្ចៀសកុំឱ្យអ៊ីរ៉ង់មានអាវុធនុយក្លេអ៊ែរ។
ទីប្រឹក្សាសន្តិសុខជាតិសហរដ្ឋអាមេរិកលោក Sullivan បានប្រកាសថា ការធ្វើឱ្យសម្រេចបំណងនេះ តាមរយៈការទូតជាវីធីល្អបំផុត ហើយប្រសិនបើយើងមិនមានលទ្ធផលការទូតទេ ជម្រើសផ្សេង នឹងមានបញ្ហាច្រើន។ ដូច្នេះ ការណ៍នេះ ផ្តល់ឱ្យអ៊ីរ៉ង់នូវហេតុផលខ្លះ ដើម្បីព្យាយាមជំរុញឱ្យមានសេចក្តីសម្រេចនៅឯតុចរចា»៕
