តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
អង្គការសហប្រជាជាតិបានឱ្យដឹងថា មានមនុស្សជាង២លាននាក់នៅតំបន់ហ្កាហ្សានៅតែ«ស្ថិតក្នុងស្ថានភាពប្រៀបបាននឹងសុបិន្តអាក្រក់គ្មានទីបញ្ចប់នៃការស្លាប់ និងការបំផ្លិចបំផ្លាញក្នុងកម្រិតដ៏គួរឱ្យភ្ញាក់ផ្អើល»។ ពួកគេទទួលរងនូវការភ័យខ្លាច ប្រឈមនឹងភាពស្រេកឃ្លាន ស្ថានភាពដែលមិនមែនដូចជាមនុស្ស និងជំងឺដែលរួមទាំងជំងឺស្វិតដៃជើងផងដែរ។
អ្នកតំណាងបម្រុងរបស់សហរដ្ឋអាមេរិកសម្រាប់កិច្ចការនយោបាយពិសេសប្រចាំនៅអង្គការសហប្រជាជាតិលោក Robert Wood បានថ្លែងថា៖ «ការបញ្ជាក់ថាមានមេរោគនៃជំងឺស្វិតដៃជើងដែលកើតចេញពីវ៉ាក់សាំងបង្ការជំងឺនេះនៅតំបន់ហ្កាហ្សាធ្វើឱ្យមានការព្រួយបារម្ភ និងបង្ហាញអំពីតម្រូវការឱ្យមានវិធានការជាបន្ទាន់ដើម្បីដោះស្រាយហានិភ័យផ្នែកសុខភាពដ៏សំខាន់ និងកំពុងកើនឡើងដែលកើតមានដល់ប្រជាពលរដ្ឋនៅតំបន់ហ្កាហ្សា»។
លោក Robert Wood ថ្លែងទៀតថា៖ «ការប្រយុទ្ធគ្នាបាននាំឱ្យប្រព័ន្ធសុខាភិបាលនៅតំបន់ហ្កាហ្សាឈានទៅដល់ការដួលរលំ និងធ្វើឱ្យមានការស្មុគស្មាញដល់សមត្ថភាពរបស់សហគមន៍អន្តរជាតិក្នុងការឆ្លើយតបទៅនឹងការផ្ទុះឡើងនៃជំងឺ។ ការប្រយុទ្ធគ្នានេះ ក៏បាននាំឱ្យមានការបរាជ័យនៃប្រព័ន្ធគ្រប់គ្រងកាកសំណល់ និងហេដ្ឋារចនាសម្ពន្ធសំខាន់ៗដែលជាតម្រូវការមូលដ្ឋានរបស់ពលរដ្ឋប៉ាឡេស្ទីនផងដែរ»។
លោក Robert Wood បានថ្លែងបន្តទៀតថា៖ «ក្នុងពេលជាមួយគ្នានេះ អាហាររូបត្ថម្ភមិនល្អ និងការចាក់ថ្នាំបង្ការតាមទម្លាប់ត្រូវបានរំខាន ដែលការណ៍នេះបានបង្កើនហានិភ័យផ្នែកសុខភាពដល់ប្រជាពលរដ្ឋយ៉ាងខ្លាំង និងធ្វើឱ្យប៉ះពាល់ដល់សមត្ថភាពរបស់ពួកគេក្នុងការប្រយុទ្ធប្រឆាំងនឹងការរីករាលដាលនៃជំងឺឆ្លង»។
លោក Robert Wood បានថ្លែងបន្ថែមទៀតថា៖ «បញ្ហាប្រឈមទាំងនេះ និងបញ្ហាមនុស្សធម៌ផ្សេងទៀតបង្ហាញឱ្យឃើញកាន់តែច្បាស់អំពីតម្រូវការឱ្យមានកិច្ចព្រមព្រៀងបទឈប់បាញ់កាន់តែខ្លាំងឡើង»។
តាមការពិតជាក់ស្តែង គឺមានតែកិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងប៉ុណ្ណោះដែលជាមធ្យោបាយតែមួយគត់ដើម្បីកែលម្អស្ថានការណ៍នៅតំបន់ហ្កាហ្សា។
ហេតុដូច្នេះហើយបានជានៅក្នុងជំនួបរបស់លោកជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ប្រធានាធិបតីសហរដ្ឋអាមេរិកលោក Joe Biden បានទទូចអំពីតម្រូវការដើម្បីបំពេញចន្លោះប្រហោងដែលនៅសល់រវាងភាគីសង្រ្គាមទាំងពីរ និងដើម្បីសម្រេចកិច្ចព្រមព្រៀងបទឈប់បាញ់ឱ្យបានឆាប់តាមដែលអាចធ្វើទៅបាន។
លោក Robert Wood បានថ្លែងទៀតថា៖ «លោកប្រធានាធិបតី [Biden] ក៏បានលើកឡើងអំពីវិបត្តិមនុស្សធម៌នៅតំបន់ហ្កាហ្សាផងដែរ»។
លោក Robert Wood បានថ្លែងបន្តថា៖ «បទឈប់បាញ់នឹងអាចឱ្យយើងបង្កើនជំនួយមនុស្សធម៌ ចាប់ផ្តើមស្តារសេវាមូលដ្ឋានឡើងវិញ ដូចជាអគ្គិសនី និងអនាម័យ និងអាចឱ្យជនស៊ីវិលប៉ាឡេស្ទីនចាប់ផ្តើមត្រឡប់ទៅផ្ទះរបស់ពួកគេ។ បទឈប់បាញ់ក៏នឹងបង្កើតបរិយាកាសសុវត្ថិភាព និងអំណោយផលជាងមុនសម្រាប់បុគ្គលិកសុខាភិបាល ដើម្បីអនុវត្តយុទ្ធនាការចាក់ថ្នាំបង្ការដែលត្រូវការ និងធ្វើការអន្តរាគមន៍ផ្នែកសុខភាពផ្សេងទៀត»។
លោក Robert Wood បានថ្លែងទៀតថា៖ «ទោះបីជានៅពេលយើងជំរុញគ្រប់ភាគីឱ្យជួយសម្រួលដល់ការងារសង្គ្រោះជីវិតក៏ដោយ ក៏យើងមិនត្រូវព្រងើយកន្តើយចំពោះសកម្មភាពរបស់ក្រុមហាម៉ាស់ដែលបន្តធ្វើឱ្យជនស៊ីវិល រួមទាំងបុគ្គលិកមនុស្សធម៌ និងក្រុមគ្រួសាររបស់ពួកគេប្រឈមនឹងហានិភ័យនោះទេ។ ក្រុមហាម៉ាស់អាចចាប់ផ្តើមបញ្ចប់ភាពឈឺចាប់នៅតំបន់ហ្កាហ្សានៅថ្ងៃស្អែកនេះបាន ប្រសិនបើខ្លួនទទួលយកភ្លាមៗ និងយល់ព្រមអនុវត្តដោយមិនបង្អង់យូរ ឬបន្ថែមលក្ខខណ្ឌលើកិច្ចព្រម ព្រៀងបទឈប់បាញ់ដែលបានដាក់ចេញនោះ»។
លោក Robert Wood បានថ្លែងបន្ថែមទៀតថា៖ «យើងប្តេជ្ញាធ្វើការដើម្បីបិទចន្លោះប្រហោងនៅឯតុចរចា ដើម្បីធ្វើឱ្យលទ្ធភាពទទួលបានជំនួយមនុស្សធម៌ក្នុងកម្រិតមួយប្រកបដោយនិរន្តរភាព និងបន្តធ្វើការឆ្ពោះទៅរកដំណោះស្រាយរដ្ឋពីរ ដែលប្រជាពលរដ្ឋអ៊ីស្រាអែលនិងប៉ាឡេស្ទីនអាចរស់នៅប្រកបដោយសន្តិភាព និងសេចក្តីថ្លៃថ្នូរ»៕
