តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ក្នុងការឆ្លើយតបចំពោះសង្គ្រាមរបស់រុស្ស៊ីប្រឆាំងនឹងប្រទេសអ៊ុយក្រែន ដែលគ្មានការបង្ករឿងរ៉ាវជាមុននិងយ៉ាងព្រៃផ្សៃនោះ ប្រទេសហ្វាំងឡង់និងស៊ុយអែត បានដាក់ពាក្យសុំចូលជាសមាជិករបស់អង្គការអូតង់កាលពីថ្ងៃទី១៨ ខែឧសភា។ នេះជាជំហានដ៏ធំមួយសម្រាប់ប្រទេសទាំង២ ហើយមិនត្រូវមើលស្រាលនោះទេ។
ហ្វាំងឡង់ជាប្រទេសមិនចូលបក្សសម្ព័ន្ធយោធាមួយ ចាប់តាំងពីទីបញ្ចប់នៃសង្គ្រាមលោកលើកទី២មក។ ប្រវត្តិនៃការមិនចូលបក្សសម្ព័ន្ធរបស់ប្រទេសស៊ុយអែតមានកាលពីជាង២សតវត្សរ៍មុនមក។ ជំហររបស់ប្រទេសទាំង២បានឆ្លុះបញ្ចាំងពីការនិយមចូលចិត្តរបស់ពលរដ្ឋរបស់ពួកគេ។ ទស្សនៈនេះបានផ្លាស់ប្តូរដោយសារតែការឈ្លានពានពេញទំហឹងរបស់រុស្ស៊ីលើប្រទេសអ៊ុយក្រែនកាលពីថ្ងៃទី២៤ ខែកុម្ភៈ។ នៅពាក់កណ្តាលខែឧសភា ពលរដ្ឋហ្វាំងឡង់និងស៊ុយអែតជាច្រើនលើសលប់បានសម្រេចថា ដើម្បីសុវត្ថិភាពរបស់ខ្លួន ប្រទេសទាំង២ត្រូវតែចូលរួមសម្ព័ន្ធភាពការពារប្រទេសរបស់អង្គការអូតង់។
ក្រោយពីពិគ្រោះយោបល់ជាមួយគ្នាមក សម្ព័ន្ធមិត្តអង្គការអូតង់បានស្វាគមន៍ការដាក់ពាក្យសុំចូលជាសមាជិករបស់ប្រទេសស្កង់ឌីណាវីទាំងពីរ ដោយយល់ស្របជាមួយសេចក្តីថ្លែងការណ៍របស់ប្រធានាធិបតីសហរដ្ឋអាមេរិកលោក Joe Biden ដែលថា «ការមានសមាជិកថ្មី២ទៀតរបស់អង្គការអូតង់នៅក្នុងតំបន់ស្កង់ឌីណាវីនឹងធ្វើឱ្យប្រសើរឡើងនូវសន្តិសុខរបស់សម្ព័ន្ធមិត្តយើង ហើយនឹងបង្កើនកិច្ចសហប្រតិបត្តិ្កការខាងសន្តិសុខនៅទូទាំងតំបន់នោះ»។
កាលពីថ្ងៃទី២៩ ខែមិថុនា អង្គការអូតង់បានអញ្ជើញប្រទេសហ្វាំងឡង់និងស៊ុយអែតជាផ្លូវការណ៍ឱ្យចូលរួមក្នុងសម្ព័ន្ធភាពនេះ ហើយនៅថ្ងៃទី៥ ខែកក្កដា ឯកអគ្គរដ្ឋទូតរបស់អង្គការអូតង់បានចុះហត្ថលេខាលើពិធីការយល់ព្រមសម្រាប់ហ្វាំងឡង់និងស៊ុយអែត។
អគ្គលេខាធិការអង្គការអូតង់លោក Jens Stoltenberg បាននិយាយថា «នេះជាព្រឹត្តិការណ៍ប្រវត្តិសាស្ត្រសម្រាប់ប្រទេសហ្វាំងឡង់ ស៊ុយអែត អង្គការអូតង់ និងសម្រាប់សន្តិសុខរួមរបស់យើង»។
ឯកសារទាំងនោះឥឡូវនេះត្រូវទទួលសច្ចានុម័តពីសមាជិកនីមួយៗរបស់អង្គការអូតង់ជាទូទៅតាមរយៈអង្គនីតិប្បញ្ញត្តិ។ ដំណើរការនេះកំពុងធ្វើឡើងដោយមានប្រទេសកាណាដានិងដាណាម៉ាកដែលជាសម្ពន្ធមិត្តរបស់អង្គការអូតង់ផ្តល់សច្ចានុម័តលើពិធីការនេះមុនគេ។
ការយល់ព្រមឱ្យស៊ុយអែតនិងហ្វាំងឡង់ក្លាយជាសមាជិករបស់អង្គការអូតង់បានទទួលការគាំទ្រយ៉ាងខ្លាំងដោយគណបក្សទាំង២នៅក្នុងសភាសហរដ្ឋអាមេរិក។
លោកប្រធានាធិបតី Joe Biden បានមានប្រសាសន៍ថា «សហរដ្ឋអាមេរិកគាំទ្រយ៉ាងខ្លាំងដល់សមាជិកភាពរបស់ប្រទេសទាំង២។ ហ្វាំងឡង់និងស៊ុយអែតជាប្រទេសមានប្រជាធិបតេយ្យរឹងមាំដែលមានសមត្ថភាពយោធាខ្ពង់ខ្ពស់។ សមាជិកភាពរបស់ប្រទេសទាំង២នឹងពង្រឹងសន្តិសុខ និងផលប្រយោជន៍រួមក្នុងសម្ព័ន្ធភាពអង្គការអូតង់នៃត្រើយទាំងសងខាងនៃមហាសមុទ្រអាត្លង់ទិក។ ខ្ញុំរង់ចាំធ្វើការជាមួយលោកអគ្គលេខាធិការអង្គការអូតង់ Stoltenberg សម្ព័ន្ធមិត្តរបស់យើង និងជាមួយសភាដើម្បីធ្វើឱ្យប្រាកដថា យើងអាចស្វាគមន៍ប្រទេសទាំង២ដ៏ឆាប់រហ័សនៅក្នុងសម្ព័ន្ធភាពរបស់យើង។ សម្ព័ន្ធភាពរបស់យើងកាន់តែរឹងមាំឡើង កាន់តែរួបរួមឡើង ហើយនឹងកាន់តែតាំងចិត្តឡើងជាងពេលណាៗទាំងអស់»៕
