តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
រដ្ឋមន្ត្រីការបរទេសសហរដ្ឋអាមេរិកលោក Antony Blinken បានពន្យល់ថា របាយការណ៍ស្តីពីការជួញដូរមនុស្សឆ្នាំ២០២៤ គឺជារបាយការណ៍មួយដែលមានលក្ខណៈទូលំទូលាយ និងមានគោលបំណងវាយតម្លៃស្ថានភាពនៃកិច្ចខិតខំប្រឹងប្រែងប្រឆាំងការជួញដូរមនុស្សនៅទូទាំង១៨៨ ប្រទេស និងដែនដី រួមទាំងសហរដ្ឋអាមេរិកផងដែរ។ អស់រយៈពេលជាងពីរទស្សវត្សរ៍មកហើយ ដែលរបាយការណ៍អំពីការជួញដូរមនុស្សនេះត្រូវបានចងក្រងជាឯកសារអំពីនិន្នាការដែលកំពុងកើតឡើង គូសបញ្ជាក់អំពីវឌ្ឍនភាព និងការធ្លាក់ចុះ និងកំណត់អំពីគំនិតផ្តួចផ្តើមប្រកបដោយប្រសិទ្ធភាពនៅក្នុងការប្រយុទ្ធប្រឆាំងនឹងការជួញដូរមនុស្ស។
លោក Blinken បាននិយាយទៀតថា ខណៈពេលដែលការជួញដូរមនុស្សបានចាប់ផ្តើមមានឡើងតាំងពីការកកើតនៃមនុស្សជាតិនោះ ជនល្មើសនៅតែបន្តវិវត្តវិធីសាស្រ្តរបស់ពួកគេ។ ប្រាកដណាស់របាយការណ៍ឆ្នាំ២០២៤ ពិនិត្យស៊ីជម្រៅអំពីតួនាទីដែលកំពុងកើនឡើងនៃបច្ចេកវិទ្យាឌីជីថលនៅក្នុងការជួញដូរមនុស្ស។
នៅជុំវិញពិភពលោក បណ្តាញជួញដូរមនុស្សមានគោលដៅ និងជ្រើសរើសជនរងគ្រោះតាមអ៊ីនធឺណិត តាមរយៈប្រព័ន្ធផ្សព្វផ្សាយសង្គម តាមរយៈកម្មវិធីណាត់ជួប តាមរយៈវេទិកាហ្គេម។ ជនល្មើសធ្វើប្រតិបត្តិការផ្នែកហិរញ្ញវត្ថុដោយប្រើរូបិយប័ណ្ណគ្រីបតូស្រមោល។ ពួកគេប្រើវិធីការពារដើម្បីមិនឱ្យមានភាពងាយស្រួលក្នុងការស្វែងរកសកម្មភាពរបស់ពួកគេ ឬបញ្ជាក់ថា តើពួកគេកំពុងប្រតិបត្តិការនៅក្នុងប្រទេសណា។ ហើយអ្វីដែលកំពុងតែកើនឡើងខ្លាំងនោះ គឺឈ្មួញជួញដូរមនុស្សបានបង្ខិតបង្ខំជនរងគ្រោះរបស់ពួកគេឱ្យចូលរួមក្នុងការបោកប្រាស់តាមអ៊ីនធឺណិត។
លោក Blinken បានថ្លែងដោយប្រុងប្រយ័ត្នថា ប្រព័ន្ធផ្សព្វផ្សាយសង្គមអាចពង្រឹងសុភនិច្ឆ័យរួមអំពីអ្នកដែលអាចជាជនរងគ្រោះនៃការជួញដូរមនុស្ស រួមជាមួយនឹងយេនឌ័រ ពូជសាសន៍ ជាតិសាសន៍ និងវណ្ណៈ។
លោក Blinken បានថ្លែងថា «ដូចជាការយល់ឃើញមិនត្រឹមត្រូវយ៉ាងទូលំទូលាយថា ការជួញដូរមនុស្សប៉ះពាល់តែស្ត្រី និងកុមារីប៉ុណ្ណោះ។ ការយល់ខុសទាំងនេះកំណត់សមត្ថភាពរបស់សហគមន៍ អាជ្ញាធរ និងសូម្បីតែជនរងគ្រោះខ្លួនឯងក្នុងការយល់ដឹងអំពីការរំលោភបំពាន ដោយវាកើតឡើងក្នុងពេលជាមួយគ្នា»។
លោក Blinken បាននិយាយទៀតថា ក្នុងពេលជាមួយគ្នានេះ របាយការណ៍នៅឆ្នាំនេះបង្ហាញពីរបៀបដែលបច្ចេកវិទ្យាមួយចំនួនអាចត្រូវបានគេប្រើប្រាស់ដើម្បីស្វែងរក និងបង្អាក់ការជួញដូរមនុស្ស និងការចាប់ឱ្យជនល្មើសទទួលខុសត្រូវបានប្រសើរជាងមុន។
លោក Blinken បាននិយាយទៀតថា៖ «សង្គមស៊ីវិល និងវិស័យឯកជនបានសហការគ្នាដើម្បីបង្កើតបញ្ញាសប្បនិម្មិត AI ជាឧបករណ៍ដែលស្វែងរកប្រតិបត្តិការជួញដូរមនុស្ស។ ... សម្ពន្ធនៃក្រុមហ៊ុនបច្ចេកវិទ្យាឈានមុខគេ និងអង្គការក្រៅរដ្ឋាភិបាលដែលធ្វើការប្រឆាំងនឹងការជួញដូរមនុស្សកំពុងបង្កើតគំនិតផ្តួចផ្តើមដែលសិក្សាដោយម៉ាស៊ីន ដើម្បីដោះស្រាយនិន្នាការ និងយុទ្ធសាស្ត្រនៃការជួញដូរមនុស្សដែលកំពុងកើតមាន។ ការណ៍នេះអនុញ្ញាតឱ្យអ្នកតស៊ូមតិ និងរដ្ឋាភិបាលកំណត់អត្តសញ្ញាណ និងចែករំលែកអំពីភាពងាយរងគ្រោះថ្មីៗ ក៏ដូចជាតាមដាន និងកាត់ទោសជនដែលរៀបគម្រោងជួញដូរមនុស្ស ប្រកបដោយប្រសិទ្ធភាពជាងមុន»។
ក្រុមសង្គមស៊ីវិលកំពុងដាក់ឱ្យដំណើរការកម្មវិធីទូរសព្ទដើម្បីផ្តល់ព័ត៌មានដល់បុគ្គល និងក្រុមដែលងាយរងគ្រោះនូវព័ត៌មានអំពីសិទ្ធិរបស់ពួកគេ ក៏ដូចជាប្រាក់ឈ្នួល និងលក្ខខណ្ឌការងារដែលផ្តល់ដោយជនដែលអាចនឹងក្លាយជានិយោជករបស់ពួកគេ។ ឧបករណ៍ឌីជីថលផ្សេងទៀតអាចជួយដល់កម្មករក្នុងការចងក្រងឯកសារ និងរាយការណ៍ពីការជួញដូរមនុស្ស។
លោក Blinken បាននិយាយបន្ថែមទៀតថា៖ «ការជួញដូរមនុស្សគឺជាបញ្ហាដែលប្រទេសណាមួយក៏ដោយមិនអាចដោះស្រាយដោយឯកឯងបានទេ។ ជាងនេះទៅទៀត យើងត្រូវធ្វើការមិនត្រឹមតែជាមួយរដ្ឋាភិបាលប៉ុណ្ណោះទេ គឺថែមទាំងរួមជាមួយនឹងវិស័យឯកជន សង្គមស៊ីវិល អង្គការពហុជាតិសាសន៍ ប្រជាពលរដ្ឋ និងអ្នករស់រានមានជីវិតពីការជួញដូរមនុស្សដែលយល់ពីបញ្ហាប្រឈមដ៏ស្មុគស្មាញ និងរបៀបដែលយើងអាចតតាំងនឹងបញ្ហានេះបាន»៕
