តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងកិច្ចប្រជុំកំពូលរបស់សម្ព័ន្ធអូតង់ក្នុងប្រទេសលីទុយអានីកាលពីពេលថ្មីៗនេះ ប្រធានាធិបតីអាមេរិកលោក Joe Biden បានទទូចឲ្យប្រទេសសមាជិកសម្ព័ន្ធនេះ «មានស្មារតីដូចគ្នាអំពីសាមគ្គីភាព បុព្វហេតុរួម និងការប្តេជ្ញាចិត្តដែលយើងបានបង្ហាញក្នុងការឆ្លើយតបទៅនឹងការឈ្លានពានរបស់រុស្ស៊ីក្នុងប្រទេសអ៊ុយក្រែន និងនាំដៃគូច្រើនថែមទៀតចូលក្នុងសម្ព័ន្ធនេះ ពេលយើងបន្តធ្វើការដើម្បីកសាងពិភពលោកមួយដែលយើងចង់បាន»។
លោក Biden បានថ្លែងថា «យើងមានជម្រើស។ ជម្រើសរវាងពិភពលោកមួយដែលកំណត់ដោយការសម្លុត និងការកេងប្រវ័ញ្ចដោយអំណាច ឬពិភពលោកមួយដែលយើងទទួលស្គាល់ថា ជោគជ័យរបស់យើងចងភ្ជាប់នឹងជោគជ័យរបស់ប្រទេសដទៃ»។
លោក Biden និយាយថា លោកផ្តោតលើការធ្វើឲ្យរស់ឡើងវិញនូវសម្ព័ន្ធភាពរបស់អាមេរិកនៅជុំវិញពិភពលោក។ លោកថ្លែងថា «ប៉ុន្មានឆ្នាំមកនេះ យើងបានពង្រីកភាពជាដៃគូឆ្លងមហាសមុទ្រអាត្លង់ទិក ដោយបញ្ជាក់ឡើងវិញពីសារៈសំខាន់នៃទំនាក់ទំនងរវាងអឺរ៉ុបនិងសហរដ្ឋអាមេរិកជាយុថ្កានៃស្ថិរភាពសាកលលោក។ គំនិតដែលថា សហរដ្ឋអាមេរិក អាចរីកចម្រើនបានដោយគ្មានអឺរ៉ុបដែលមានសន្តិសុខ មិនសមហេតុផលទេ»។
សហរដ្ឋអាមេរិក ក៏ពង្រឹងកាន់តែស៊ីជម្រៅនូវសម្ព័ន្ធភាពរបស់ខ្លួនក្នុងតំបន់ឥណ្ឌូប៉ាស៊ីហ្វិក ជាមួយប្រទេសជប៉ុន សាធារណរដ្ឋកូរ៉េ អូស្ត្រាលី និងហ្វីលីពីនផងដែរ។
លោកប្រធានាធិបតី Biden បានប្រកាសថា តាមរយៈភាពជាដៃគូចតុភាគី (Quad) ដែលរួមមានអូស្ត្រាលី ឥណ្ឌា ជប៉ុន និងសហរដ្ឋអាមេរិក «យើងប្រមូលផ្តុំប្រទេសប្រជាធិបតេយ្យធំៗក្នុងតំបន់មកសហការគ្នា ដើម្បីធ្វើឲ្យតំបន់ឥណ្ឌូប៉ាស៊ីហ្វិក សេរី និងបើកចំហ រីកចម្រើន និងមានសន្តិសុខ»។
លោក Biden បានជំរុញការកសាងសម្ព័ន្ធភាពទូលំទូលាយ «ដើម្បីពង្រឹងនិងការពារប្រព័ន្ធអន្តរជាតិដែលចាក់ឬសក្នុងនីតិរដ្ឋ»។ លោក Biden ថ្លែងថា៖ «យើងត្រូវតែរួបរួមគ្នាដើម្បីការពារសិទ្ធិនិងសេរីភាពដែលទ្រទ្រង់លំហូរនៃគំនិតនិងពាណិជ្ជកម្ម ហើយដែលបានធ្វើឲ្យមានកំណើនទូទាំងសាកលលោករាប់ទសវត្សរ៍មកហើយ។ ពិតណាស់ មិនត្រឹមតែអធិបតេយ្យភាពនិងបូរណភាពដែនដីប៉ុណ្ណោះទេ ថែមទាំងគោលការណ៍ដូចជាសេរីភាពនាវាចរណ៍និងលំហអាកាស ដោយរក្សាផ្ទៃសមុទ្រនិងផ្ទៃមេឃរួមរបស់យើង ឲ្យនៅចំហ ដើម្បីឲ្យប្រទេសនានាមានសិទ្ធិស្មើគ្នាក្នុងការប្រើប្រាស់លំហរួមជាសកលរបស់យើង»។
លោក Biden និយាយថា «យើងកំពុងឆ្លុះបញ្ចាំងមើលពីជម្រើសដែលយើងជ្រើសយក ដែលនឹងកែប្រែទិសដៅនៃពិភពលោករបស់យើងក្នុងពេលប៉ុន្មានទសវត្សរ៍ខាងមុខនេះ»។
លោក Biden បានប្រកាសទៀតថា «ខ្ញុំជឿថា ដោយសារប្រទេសនានារួមគ្នាដើម្បីបុព្វហេតុរួម យើងអាចធានាទស្សនវិស័យដែលយើងមានរួមគ្នានិងសេរីភាពដែលយើងលើកតម្កើង មិនមែនគ្រាន់តែនិយាយឲ្យរួចពីមាត់ក្នុងគ្រាដ៏លំបាកទេ តែវាជាផែនទីបង្ហាញផ្លូវឆ្ពោះទៅរកអនាគតមួយដែលយើងអាចទៅដល់ បើយើងរួបរួមគ្នា»៕
បទវិចារណកថា៖ លោក Biden ផ្តោតលើការកសាងសម្ព័ន្ធភាព
