តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
កាលពីពេលថ្មីៗនេះ រដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រគល់រង្វាន់សេរីភាពសាសនាអន្តរជាតិ (International Religious Freedom Awards) ដល់បុគ្គល៧នាក់និងបព្វជិតមួយក្រុមជាការទទួលស្គាល់សេចក្តីក្លាហាន និងការប្តេជ្ញារបស់ពួកគេក្នុងការឧបត្ថម្ភផ្ចុងផ្តើមនិងការពារសេរីភាពសាសនាសាកល។
ជ័យលាភីទីមួយ គឺលោក Farid Ahmed បានបន្តផ្សព្វផ្សាយសារនៃសេចក្តីសង្ឃឹមនិងការអន់ឱននៅក្នុងប្រទេសនូវែលសេឡង់និងក្នុងទូទាំងពិភពលោកក្រោយភរិយាលោកត្រូវបានសម្លាប់នៅព្រះវិហារ mosque មួយក្នុងក្រុង Christchurch។
នៅក្នុងប្រទេសនីហ្សេរីយ៉ាលោក Kola Alapinni ជាមេធាវីសិទ្ធិមនុស្សអន្តរជាតិម្នាក់ដែលការពារខាងផ្លូវច្បាប់ក្នុងករណីសេរីភាពសាសនាជាច្រើននិងជំទាស់នឹងធម្មនុញ្ញភាពនៃច្បាប់ស្តីពីការប្រមាថខាងសាសនា។
ជ័យលាភីម្នាក់ទៀត គឺលោក Mirza Dinnayi អ្នកការពារសិទ្ធិមនុស្ស Yezidi ក្លាហានម្នាក់និងជាសកម្មជនខាងសេរីភាពសាសនាដែលបានឧទ្ទិសជីវិតលោកក្នុងការជួយក្រុមជនរងគ្រោះដោយសារភេរវកម្មនិងការរើសអើង ការជម្លៀសស្ត្រីនិងកុមារពីដែនដីគ្រប់គ្រងដោយពួក ISIS និងផ្តល់ឱ្យអ្នកនៅរស់រានមានជីវិតនូវការធ្វើឱ្យល្អឡើងវិញនិងការគាំទ្រដោយមិនគិតកម្រៃ។
លោក Peter Jacob ជាអ្នកការពារសេរីភាពសាសនានិងសិទ្ធិមនុស្សគ្មាននឿយហត់ ម្នាក់ដែលបានចំណាយពេលវេលាជាង៣៥ឆ្នាំប្រយុទ្ធដើម្បីសិទ្ធិសហគមន៍ជនភាគ តិចខាងសាសនា។
ចាប់តាំងពីឆ្នាំ ២០១៩ មក លោកស្រី Martha Patricia Molina Montenegro បានប្រមូលឯកសារអំពីការសង្កត់សង្កិនរបស់រដ្ឋាភិបាលនីការ៉ាហ្គ័រលើអង្គការវិហារកាតូលីកនិងសហគមន៍សាសនា។ ដោយភ័យខ្លាចការចាប់ឃុំឃាំងក្នុងពន្ធនាគារ លោកស្រី Molina បានរត់គេចខ្លួនចេញពីប្រទេសនីការ៉ាហ្គ័រកាលពីខែមិថុនាឆ្នាំ២០២១។ តាំងពី ឆ្នាំ ២០២២ មក របាយការណ៍របស់លោកស្រី Molina បានផ្តោតលើការប្រមូលឯកសារអំពីការធ្វើទុក្ខបុកម្នេញដោយប៉ូលិសនិងអំពើហិង្សាដឹកនាំដោយរដ្ឋាភិបាលប្រឆាំងនឹងសេរីភាពសាសនា ជាពិសេសប្រឆាំងនឹងបព្វជិតកាតូលីកនៅនីការ៉ាហ្គ័រ។
កើតនៅក្នុងគ្រួសារមួយនៃក្រុមអ្នកនៅរស់ពីហាយនភាព (Holocaust) លោកស្រី Tali Nates នៃប្រទេសអាហ្វ្រិកខាងត្បូងបានរៀបរាប់អំពីរឿងផ្ទាល់ខ្លួនរបស់លោកស្រីក្នុងឋានៈជាអ្នកបង្កើតនិងជានាយិកានៃមជ្ឈមណ្ឌលហាយនភាពនិងការប្រល័យពូជសាសន៍នៅក្រុង Johannesburg ដើម្បីណែនាំជនជាតិអាហ្វ្រិកខាងត្បូង-ជាពិសេសក្រុមយុវជន-កុំឱ្យប្រើវោហារសាស្ត្រធ្វើឱ្យក្រុមជនងាយរងគ្រោះអាប់កេរ្តិ៍ឈ្មោះ។
លោកស្រី Lhadon Tethong ជាស្ថាបនិកនិងជានាយិកានៃវិទ្យាស្ថានសកម្មភាពទីបេត៍ Tibet Action Institute។ លោកស្រីដឹកនាំអ្នកការពារសិទ្ធិមនុស្សមួយក្រុមក្នុងការអភិវឌ្ឍន៍និងជំរុញបច្ចេកវិទ្យាគមនាគមន៍ចំហ យុទ្ធសាស្ត្រអហិង្សា និងកម្មវិធីហ្វឹកហ្វឺនដោយមានរបៀបថ្មីៗសម្រាប់ជនជាតិទីបេត៍និងសមាជិកនៃក្រុមឯទៀតៗដែលប្រឈមនឹងការសង្កត់សង្កិនដោយសាធារណរដ្ឋប្រជាមានិតចិន។
នៅក្រោមសម្ពាធពីរដ្ឋាភិបាលក្រុងម៉ូស្គូ បព្វជិតថ្នាក់ខ្ពស់ប្រាំនាក់និងបព្វជិតថ្នាក់ទាបពីរនាក់ពីព្រះវិហារគ្រិស្តសាសនា Orthodox លម្អៀងទៅខាងរដ្ឋាភិបាលក្រុងម៉ូស្គូនៅក្នុងប្រទេសលីទុយអានី បានថ្កោលទោសសង្គ្រាមរបស់រុស្ស៊ីប្រឆាំងនឹងអ៊ុយក្រែនហើយត្រូវបានផ្សឹក។ បព្វជិតពីរនាក់មកពីវិហារគ្រឹស្តសាសនា Orthodox បេឡារុសលម្អៀងទៅខាងម៉ូស្គូបានថ្កោលទោសសង្គ្រាមរបស់រុស្ស៊ីប្រឆាំងនឹងអ៊ុយក្រែនដែរ ហើយបានរត់គេចខ្លួនទៅប្រទេសលីទុយអានី។ ពួកគេបានកសាងសហគមន៍សាសនាថ្មីមួយនៅលីទុយអានីដែលស្វាគមន៍ក្រុមអ្នកជឿនិកាយ Orthodox ឱ្យគោរពសាសនាពួកគេដោយគ្មានឥទ្ធិពលរដ្ឋាភិបាលក្រុងម៉ូស្គូ។
សហរដ្ឋអាមេរិកគោរពពួកអ្នកគាំទ្រសេរីភាពសាសនាដោយគ្មាននឿយហត់ទាំងនេះ-ដែលជាសិទ្ធិមនុស្សជាមូលដ្ឋានមួយដែលមនុស្សគ្រប់គ្នាមានសិទ្ធិត្រូវមាន៕
