តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
បើតាមលោក Geir Pedersen ប្រេសិតពិសេសរបស់លោកអគ្គលេខាធិការអង្គការសហប្រជាជាតិសម្រាប់ប្រទេសស៊ីរីថា ឆ្នាំ២០២៣ ជាឆ្នាំមានសោកនាដកម្មមួយទៀតសម្រាប់ជនស៊ីវិលស៊ីរីដែលត្រូវបានសម្លាប់ ត្រូវរបួស ខ្ចាត់ព្រាត់ពីផ្ទះ ត្រូវចាប់ឃុំឃាំងនិងត្រូវចាប់ពង្រត់ដោយចំនួនច្រើន ហើយនៅពេលនេះប្រឈមនឹងគ្រោះថ្នាក់នៃការរាលដាលក្នុងតំបន់។ លោកបាននិយាយថា «មានសេចក្តីត្រូវការជាបន្ទាន់ឱ្យមានការទប់ចិត្តខ្លាំងបំផុតដោយតួអង្គទាំងអស់ទាំងស៊ីរីនិងមិនមែនស៊ីរី» និងឱ្យមាន«ការបន្ថយភាពតានតឹងនៅខាងក្នុងនិងលើប្រទេសស៊ីរី»។
លោក Robert Wood អ្នកតំណាងបម្រុងរបស់សហរដ្ឋអាមេរិកប្រចាំអង្គការសហប្រជាជាតិបាននិយាយថា «នៅពេលជិតដាច់ឆ្នាំ២០២៣ ដំណើរការនយោបាយស៊ីរីនៅតែត្រូវរារាំងហើយប្រជាពលរដ្ឋស៊ីរីនៅតែរងទុក្ខវេទនាយ៉ាងខ្លាំង»។
លោក Wood បាននិយាយថា «ក្នុងពេលជាង១២ឆ្នាំ របបគ្រប់គ្រងរបស់លោក Assad បានធ្វើសង្គ្រាមឃោរឃៅមួយប្រឆាំងនឹងប្រជាពលរដ្ឋស៊ីរី។ បន្ថែមលើនេះ ជនជាតិស៊ីរីទើបតែរើបពីផលប៉ះពាល់ដោយសារការរញ្ជួយផែនដីកាលពីខែកុម្ភៈឆ្នាំមុន។ ជាជាងចូលរួមក្នុងដំណើរការនយោបាយរបបគ្រប់គ្រងរបស់លោក Assad កាលពីពីរបីខែមុននេះ បានបង្កើនការវាយប្រហារលើប្រជារាស្ត្រខ្លួនផ្ទាល់ក្នុងផ្នែកពាយ័ព្យប្រទេសស៊ីរី»។
លោកឯកអគ្គរដ្ឋទូត Wood បានថ្លែងថា «យើងទាំងអស់គ្នាដឹងថា របបគ្រប់គ្រងរបស់លោក Assad ទទួលខុសត្រូវដល់សង្គ្រាមនេះ។ កាលពីចុងខែធ្នូ មហាសន្និបាតអង្គការសហប្រជាជាតិបានបោះឆ្នោតអំពីសេចក្តីសម្រេចចិត្តមួយសម្របសម្រួលរួមដោយសហរដ្ឋអាមេរិកអំពីស្ថានភាពសិទ្ធិមនុស្សក្នុងប្រទេសស៊ីរីដែលរំឭកពិភពលោកអំពីការរំលោភដែលរបបគ្រប់គ្រងនេះចង់ឱ្យយើងភ្លេច គឺការប្រើអាវុធគីមី ការសម្លាប់ក្រៅប្រព័ន្ធតុលាការ ការធ្វើទារុណកម្ម និងការធ្វើបាបឯទៀតៗ ការឃុំឃាំងដោយអយុត្តិធម៌ ការបាត់ខ្លួនដោយបង្ខិតបង្ខំ និងអំពើហិង្សាផ្អែកលើយេនឌ័រ»។
លោក Wood បាននិយាយថា «យើងភ្ញាក់ផ្អើលដោយរបាយការណ៍ថា អំពើហិង្សាបានកើនឡើងដល់កម្រិតអាក្រក់បំផុតតាំងពីឆ្នាំ២០១៩។ ការស្លាប់ជនស៊ីវិលរាប់រយនាក់បណ្តាលមកពីការវាយលុករបស់របបគ្រប់គ្រងនេះនិងកងកម្លាំងរុស្ស៊ីនៅ Idlib នាំឱ្យមានកង្វល់ខ្លាំង។ ការបំផ្លិចបំផ្លាញដែលពួកគេធ្វើឱ្យមានដល់ហេដ្ឋារចនាសម្ព័ន្ធនិងការគំរាមកំហែងដល់កិច្ចប្រតិបត្តិការមនុស្សធម៌បាននាំឱ្យមនុស្សរាប់សែននាក់មានគ្រោះថ្នាក់នៅរដូវត្រជាក់ជាច្រើនខែ»។
លោកឯកអគ្គរដ្ឋទូត Wood បានថ្លែងថា «យើងចួលរូមជាមួយរដ្ឋសមាជិកអង្គការសហប្រជាជាតិ ភាគច្រើនក្នុងការអំពាវនាវជាថ្មីដល់របបគ្រប់គ្រងស៊ីរីឱ្យដោះលែងជាបន្ទាន់នូវក្រុមជនទាំងអស់ដែលត្រូវបានចាប់ឃុំឃាំងតាមអំពើចិត្តនិងផ្តល់ព័ត៌មានអំពីជនរាប់សែននាក់ដែលបាត់ខ្លួន។ នៅពេលជាមួយគ្នានេះ យើងក៏ខ្វល់ខ្វាយដែរអំពីការរាលដាលក្នុងតំបន់»។ លោកបានពោលថា «យើងត្រូវតែរក្សានិងប្តេជ្ញាធ្វើឱ្យសម្រេចសេចក្តីសម្រេចចិត្តមួយផ្តោតលើស៊ីរិនិងដឹកនាំដោយស៊ីរីអំពីជម្លោះនេះតាមលំនាំសេចក្តីសម្រេចចិត្តលេខ ២២៥៤ ដែលជាផែនទីបង្ហាញផ្លូវតែមួយគត់សម្រាប់ឱ្យមានដំណោះស្រាយឋិតថេរអំពីជម្លោះនេះ»។
លោកឯកអគ្គរដ្ឋទូត Wood បាននិយាយបន្ថែមថា «ប្រជាពលរដ្ឋស៊ីរីបានរង់ចាំយូរណាស់មកហើយ។ ពួកគេស័ក្តិសមមានអនាគតដែលពួកគេប្រយុទ្ធខ្លាំងក្លាដើម្បីឱ្យមាន មានរួមការគោរពសិទ្ធិមនុស្សនិងសេរីភាពជាមូលដ្ឋានរបស់ពួកគេ»៕
បទវិចារណកថា៖ ការជំរុញឱ្យមានសេចក្តីសម្រេចចិត្តនយោបាយមួយដល់ជម្លោះក្នុងប្រទេសស៊ីរី
