តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកបានកំណត់យកការការពារសិទ្ធិមនុស្សជាអាទិភាពគោលនយោបាយមួយ។ មនុស្សគ្រប់រូបនៅគ្រប់ទីកន្លែងទាំងអស់មានសិទ្ធិទទួលបានសិទ្ធិមនុស្សជាមូលដ្ឋាននេះ។ នេះបើតាមការបញ្ជាក់របស់រដ្ឋមន្ត្រីការបរទេសសហរដ្ឋអាមេរិកលោក Antony Blinken ដែលបានថ្លែងនៅឯពិធីប្រគល់ពានរង្វាន់អ្នកការពារសិទ្ធិមនុស្ស។
លោករដ្ឋមន្ត្រី Blinken បាននិយាយថា៖ «វាគឺដោយសារតែយើងដឹងថាពិភពលោកដែលមានការគោរពសិទ្ធិមនុស្សគឺជាអ្វីដែលយើងចង់បានខ្លាំងក្លាបំផុត។ ដូចដែលបានគូសបញ្ជាក់នៅក្នុងរយៈពេល ៤ ឆ្នាំចុងក្រោយនេះ ប្រទេសដែលគោរពសិទ្ធិមនុស្សនិយាយរួមមានស្ថិរភាព សន្តិសុខ និងសន្តិភាពជាងគេ។ ប្រទេសទាំងនោះគឺជាដៃគូដ៏គួរឱ្យទុកចិត្ត។ ពួកគេគឺជាអ្នកមើលការខុសត្រូវដ៏ប្រសើរនៃផែនដីរួមរបស់យើង»។
ជ័យលាភីពានរង្វាន់សិទ្ធិមនុស្សនៅឆ្នាំនេះគឺជាបុគ្គលអង់អាចក្លាហានដែលមានឆន្ទៈហ៊ានប្រថុយគ្រោះថ្នាក់មិនធម្មតាដើម្បីការពារសិទ្ធិសេរីភាពជាមូលដ្ឋាន។
ជ័យលាភីមួយរូបក្នុងចំណោមនោះគឺអ្នកស្រី Juana Alicia Ruiz។ នៅក្រោយសង្គ្រាមស៊ីវិលក្នុងប្រទេសកូឡុំប៊ី អ្នកស្រីបានចូលរួមជាមួយស្ត្រីផ្សេងទៀតក្នុងសហគមន៍ដើម្បីបង្កើតគម្រោងមួយជួយអ្នកនៅរស់រានមានជីវិតឱ្យរៀបរាប់អំពីការរំលោភបំពានធ្វើបាបលើពួកគេនិងការលុបបំបាត់ការប៉ះទង្គិចផ្លូវចិត្តរបស់ពួកគេតាមរយៈការដេរក្រណាត់។
នៅក្នុងប្រទេសហ្កាណា លោក Ebenezer Peegahនិងអង្គការរបស់លោកបានចាប់ផ្តើមបង្កើតនិងចែកចាយព័ត៌មានថ្មីៗទាន់ហេតុការណ៍ប្រចាំថ្ងៃដល់មនុស្សស្រឡាញ់ភេទដូចគ្នា (LGBTQI+) រាប់ពាន់នាក់ដើម្បីឱ្យពួកគេអាចបញ្ចៀសពីក្រុមដែលតាំងខ្លួនជាអ្នកអនុវត្តច្បាប់បាន។
អ្នកស្រី Mary Ann Abunda បានចាកចេញពីផ្ទះរបស់អ្នកស្រីនៅក្នុងប្រទេសហ្វីលីពីនទៅប្រទេសកូវ៉ែតហើយបានក្លាយជាអ្នកធ្វើការតាមផ្ទះ។ នៅទីនោះ អ្នកស្រីបានទ្រាំទ្រនឹងការកេងប្រវញ្ចនិងការ រំលោភធ្វើបាប។ អ្នកស្រីបានរួបរួមជាមួយពលករផ្សេងទៀតដូចអ្នកស្រីដែរដើម្បីបង្កើតអង្គការមួយក្នុងបំណងគាំទ្រសិទ្ធិរបស់ពលករធ្វើការតាមផ្ទះនិងពលករចំណាកស្រុកផ្សេងទៀតនៅក្នុងប្រទេសកូវ៉ែត។
នៅក្នុងប្រទេសអាស៊ែបៃហ្សង់ លោក Rufat Safarovត្រូវបានចោទប្រកាន់ដោយមិនត្រឹមត្រូវពីបទសូកប៉ាន់និងត្រូវបានកាត់ទោសឱ្យជាប់ពន្ធនាគារ ៩ ឆ្នាំនៅក្នុងសវនាការក្លែងក្លាយ។ បន្ទាប់ពីលោកត្រូវបានដោះលែងមក លោកបានបង្កើតអង្គការមួយដើម្បីជួយអ្នកការពារសិទ្ធិមនុស្សដែលរងការវាយប្រហារ។ រដ្ឋាភិបាលបានឃុំខ្លួនលោកម្តងទៀតចំពោះការស្វះស្វែងរកទិដ្ឋាការមកសហរដ្ឋអាមេរិក។ នេះបើតាមការបញ្ជាក់របស់លោករដ្ឋមន្ត្រី Blinken។
លោក Blinken បានថ្លែងថា៖ «រដ្ឋាភិបាលអាស៊ែបៃហ្សង់ត្រូវតែដោះលែងលោក Rufat ជាបន្ទាន់ ក៏ដូចជាអ្នកកាសែត អ្នកការពារសិទ្ធិមនុស្ស អ្នកប្រឆាំងផ្នែកនយោបាយ និងអ្នកដទៃផ្សេងទៀតទាំងអស់ដែលត្រូវបានឃុំខ្លួនដោយអយុត្តិធម៌»។
លោក Thulani Rudolph Maseko បានបូជាពេលវេលាពេញមួយជីវិតរបស់លោកដើម្បីលើកស្ទួយសិទ្ធិមនុស្សនៅក្នុងប្រទេសអេស្វាទីនី។ កាលពីថ្ងៃទី ២១ ខែមករា ឆ្នាំ ២០២៣ លោកត្រូវបានគេបាញ់សម្លាប់នៅក្នុងផ្ទះរបស់លោក។ មិនមាននរណាម្នាក់ត្រូវបាននាំមកកាត់ទោសចំពោះរឿងនេះទេ។
ជ័យលាភីផ្សេងទៀតរួមមានអ្នកស្រី Aida Dzhumanazarova នៃប្រទេសកៀហ្ស៊ីស៊ីស្ថាន លោក Mang Hre Lian នៃប្រទេសភូមា និងអ្នកស្រី Amparo Carvajal នៃប្រទេសបូលីវី។
លោករដ្ឋមន្ត្រី Blinken បានថ្លែងទៀតថា៖ «ជូនចំពោះអ្នកទទួលពានរង្វាន់កិត្តិយសរបស់យើងនៅថ្ងៃនេះ ជូនចំពោះអ្នកប្រយុទ្ធដើម្បីសិទ្ធិមនុស្សនៅទូទាំងពិភពលោក ខ្ញុំជំរុញអ្នកឱ្យធ្វើជាគំរូ។ បន្តបង្ហាញឱ្យយើងឃើញនូវភាពអង់អាចក្លាហានរបស់អ្នក។ បន្តធ្វើឱ្យយើងទទួលខុសត្រូវ [ចំពោះពាក្យសម្ដីនិងទង្វើរបស់យើង]៕
