តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
លោកឯកអគ្គរដ្ឋទូត Robert Gilchrist មន្ត្រីជាន់ខ្ពស់នៃការិយាល័យទទួលបន្ទុកផ្នែកលទ្ធិប្រជាធិបតេយ្យ សិទ្ធិមនុស្ស និងការងារបាននិយាយថា របាយការណ៍សិទ្ធិមនុស្សរបស់ក្រសួងការបរទេសដែលបានចេញផ្សាយកាលពីពេលថ្មីៗនេះជាវិធីមួយដែលសហរដ្ឋអាមេរិកបង្ហាញពីការប្តេជ្ញាចិត្តរបស់ខ្លួនចំពោះសិទ្ធិជាសាកលទាំងនេះ។
លោកឯកអគ្គរដ្ឋទូត Robert Gilchrist ថ្លែងថា៖ «ទោះបីជាសិទ្ធិមនុស្សរបស់យើងមានលក្ខណៈជាសាកលក៏ដោយ ក៏សិទ្ធិទាំងនេះនៅមិនទាន់ត្រូវបានគេគោរពជាសាកលនៅឡើយទេ ហើយសហរដ្ឋអាមេរិកទទួលស្គាល់ថា ការក្រោកឈរឡើងដើម្បីសិទ្ធិទាំងនេះជាញឹកញាប់គឺមានគ្រោះថ្នាក់។ អ្នកការពារសិទ្ធិមនុស្ស និងមេដឹកនាំសង្គមស៊ីវិលនៅជុំវិញពិភពលោក តែងតែធ្វើការដោយប្រឈមមុខនឹងគ្រោះថ្នាក់យ៉ាងខ្លាំង ដើម្បីលើកកម្ពស់ជីវភាពរស់នៅរបស់មនុស្សទាំងអស់គ្នា។ សមាជិកនៃក្រុមទាំងនេះ និងអ្នកដែលទាមទារការការពារសិទ្ធិមនុស្ស ជារឿយៗត្រូវបានគេកំណត់ជាគោលដៅដោយការគំរាមកំហែងនិងការបៀតបៀន ការចាប់ខ្លួននិងអំពើហិង្សា»។
លោកឯកអគ្គរដ្ឋទូត Gilchrist បាននិយាយទៀតថា នៅពេលដែលយើងក្រឡេកមើលទៅអនាគត មានរឿងមួយច្បាស់ណាស់គឺថា «ភាពជាអ្នកដឹកនាំសាកលរបស់សហរដ្ឋអាមេរិកក្នុងការការពារនិងគាំទ្រសិទ្ធិមនុស្សគឺជារឿងចាំបាច់ជាងពេលណាៗទាំងអស់»។
លោកឯកអគ្គរដ្ឋទូត Gilchrist បានពន្យល់ថា របាយការណ៍សិទ្ធិមនុស្សបង្ហាញជូនប្រទេសនិមួយៗនូវរបាយការណ៍ដែលអាចទុកចិត្តបាន និងត្រូវបានត្រួតពិនិត្យដោយប្រុងប្រយ័ត្ន ដែលផ្តល់ឱ្យពិភពលោកនូវទិដ្ឋភាពយ៉ាងច្បាស់លាស់មួយអំពីស្ថានភាពសិទ្ធិមនុស្សនៅគ្រប់ទីកន្លែងក្នុងពិភពលោក រួមទាំងនៅប្រទេសអ៊ីរ៉ង់ផងដែរ។
លោកឯកអគ្គរដ្ឋទូត Gilchrist បាននិយាយបន្តទៀតថា៖ «នៅឆ្នាំ២០២៣ កំណត់ត្រាសិទ្ធិមនុស្សដ៏អាប់អួរបស់អ៊ីរ៉ង់បានបន្តធ្លាក់ចុះ។ របបនេះបានកំណត់គោលដៅកាន់តែខ្លាំងឡើងទៅលើសមាជិកនៃក្រុមសាសនា និងជនជាតិភាគតិច មេធាវីការពារសិទ្ធិមនុស្ស អ្នកកាសែត និងសកម្មជនសង្គមស៊ីវិល។ ស្ថានភាពទាក់ទងនឹងស្ត្រី ក៏បានបន្តធ្លាក់ចុះផងដែរ។ ស្ត្រីអ៊ីរ៉ង់ប្រឈមមុខនឹងការរើសអើងកាន់តែខ្លាំងឡើង តាមរយៈការអនុវត្តការដាក់ទណ្ឌកម្មលើមនុស្សដែលបំពានលើការកំណត់របៀបស្លៀកពាក់ដែលការណ៍នេះបាននាំឱ្យមានការតវ៉ានិងការរីករាលដាលនៃការមិនគោរពសណ្តាប់ធ្នាប់ក្នុងសង្គម»។
លោកឯកអគ្គរដ្ឋទូត Gilchrist បានថ្លែងទៀតថា៖ «ហើយស្ត្រី[អ៊ីរ៉ង់]និងសកម្មជនសិទ្ធិមនុស្សជាច្រើនបានទទួលការកាត់ទោសឱ្យជាប់ពន្ធនាគារបន្ថែមទៀតសម្រាប់សកម្មភាពជាសកម្មជនរបស់ពួកគេ ហើយពួកគេនៅតែស្ថិតនៅក្រោមការឃុំឃាំងនៅឡើយ»។
លោក Gilchrist បានថ្លែងបន្តទៀតថា៖ «អាជ្ញាធរបន្តឃុំខ្លួន កាត់ទោសនិងប្រហារជីវិតមនុស្ស នៅក្នុងកិច្ចប្រឹងប្រែងមួយដើម្បីបង្ក្រាបការតវ៉ាដោយសន្តិវិធីដែលបានចាប់ផ្តើមបន្ទាប់ពីការស្លាប់របស់នាង Mahsa Jina Amini កាលពីថ្ងៃទី២២ ខែកញ្ញា ខណៈពេលដែលនាងស្ថិតនៅក្នុងការឃុំឃាំងរបស់ពួកប៉ូលិសសីលធម៌»។
ក្រសួងការបរទេសសហរដ្ឋអាមេរិកបានដាក់កំហិតទិដ្ឋាការ និងទណ្ឌកម្មសេដ្ឋកិច្ច ដើម្បីលើកកម្ពស់ការទទួលខុសត្រូវចំពោះការរំលោភសិទ្ធិមនុស្សរបស់អាជ្ញាធរអ៊ីរ៉ង់ ចាប់តាំងពីមានការបង្ក្រាបនាពេលថ្មីៗនេះ ក្រោយពីកុប្បកម្មឆ្នាំ២០២២។
លោកឯកអគ្គរដ្ឋទូត Gilchrist បានថ្លែងបន្ថែមទៀតថា៖ «តាមរយៈការបង្ហាញអំពីស្ថានភាពសិទ្ធិមនុស្សរបស់ប្រទេសជាសត្រូវនិងប្រទេសជាដៃគូរបស់យើងដោយស្មើភាពគ្នា ហើយតាមរយៈការលើកកម្ពស់កិច្ចខិតខំប្រឹងប្រែងដោយមិនគិតតែពីខ្លួនឯងរបស់អ្នកការពារសិទ្ធិមនុស្ស និងក្រុមសង្គមស៊ីវិលដែលកំពុងធ្វើការដើម្បីបង្កើនការគោរពសិទ្ធិទាំងនោះ សហរដ្ឋអាមេរិកកំពុងជួយរួមចំណែកដល់ពិភពលោកដែលសិទ្ធិទាំងនោះត្រូវបានការពារប្រសើរជាងមុនសម្រាប់មនុស្សគ្រប់គ្នា»៕
