តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ក្នុងអំឡុងពេលថ្លែងសុន្ទរកថានៅក្នុងប្រទេសសិង្ហបុរីអំពីគោលនយោបាយការបរទេសកាលពីខែសីហាកន្លងទៅនេះ អនុប្រធានាធិបតីសហរដ្ឋអាមេរិកអ្នកស្រី Kamala Harris បាននិយាយថា៖ «សហរដ្ឋអាមេរិកគឺជាផ្នែកមួយដ៏មានមោទនភាពនៃតំបន់ឥណ្ឌូប៉ាស៊ីហ្វិក (Indo-Pacific)។ តំបន់នេះមានសារៈសំខាន់ខ្លាំងបំផុតសម្រាប់សន្តិសុខ និងវិបុលភាពរបស់ប្រទេសជាតិយើង»។
អ្នកស្រីអនុប្រធានាធិបតី Harris បានចង្អុលបង្ហាញថា តំបន់ឥណ្ឌូប៉ាស៊ីហ្វិក គឺជាទីតាំងរបស់សម្ព័ន្ធមិត្តនិងដៃគូជិតស្និទ្ធបំផុតមួយចំនួនរបស់សហរដ្ឋអាមេរិក។ ការនាំចេញរបស់សហរដ្ឋអាមេរិកទៅកាន់តំបន់នេះផ្គត់ផ្គង់ដល់ការងារសម្រាប់ពលរដ្ឋអាមេរិកចំនួន ៤ លាននាក់។ នៅក្នុងឆ្នាំ ២០១៩ សហរដ្ឋអាមេរិកបានធ្វើពាណិជ្ជកម្មទ្វេភាគីចំនួនជិត ២ លានលានដុល្លារ។
អ្នកស្រីបានកត់សម្គាល់ថា ជីវភាពរស់នៅរបស់មនុស្សរាប់លាននាក់ពឹងផ្អែកលើពាណិជ្ជកម្មក្នុងទឹកប្រាក់រាប់ពាន់លានដុល្លារ ដែលចរាចរកាត់តាមសមុទ្រចិនខាងត្បូង (South China Sea) ជារៀងរាល់ថ្ងៃ។
អ្នកស្រី Harris បានបញ្ជាក់ថា ចក្ខុវិស័យមួយផ្នែករបស់សហរដ្ឋអាមេរិកសម្រាប់តំបន់ឥណ្ឌូប៉ាស៊ីហ្វិក គឺសេរីភាពនៃការធ្វើនាវាចរណ៍ «ដែលមានសារៈសំខាន់សម្រាប់យើងទាំងអស់គ្នា»។
បន្ថែមពីលើសេរីភាពនាវាចរណ៍តាមសមុទ្រនិងការធ្វើពាណិជ្ជកម្មដែលគ្មានការបង្អាក់ ចក្ខុវិស័យរបស់សហរដ្ឋអាមេរិកសម្រាប់តំបន់ឥណ្ឌូប៉ាស៊ីហ្វិក ក៏មានផ្នែកសំខាន់ផ្សេងទៀតផងដែរ។
អ្នកស្រី Harris បានកត់សម្គាល់ថា ផ្នែកសំខាន់ផ្សេងទៀតនោះមានដូចជា «សន្តិភាពនិងស្ថិរភាព...ការធ្វើឲ្យប្រសើរឡើងនូវស្ថានភាពសិទ្ធិមនុស្ស ការប្ដេជ្ញាចំពោះប្រព័ន្ធរៀបរយដែលផ្អែកលើច្បាប់អន្តរជាតិ និងការទទួលស្គាល់ថា ផលប្រយោជន៍រួមរបស់យើងមិនមែនជាការយកចាញ់ឈ្នះនោះទេ»។
សហរដ្ឋអាមេរិក រួមសាមគ្គីជាមួយនឹងសម្ព័ន្ធមិត្តនិងដៃគូរបស់ខ្លួនដើម្បីប្រឈមទប់ទល់នឹងការគំរាមកំហែងណាមួយចំពោះចក្ខុវិស័យនេះ ដែលក្នុងនោះមានទាំងការគំរាមកំហែងនៅក្នុងសមុទ្រចិនខាងត្បូងផងដែរ។
អ្នកស្រីអនុប្រធានាធិបតី Harris ថ្លែងដូច្នេះថា៖ «រដ្ឋាភិបាលចិននៅបន្តបង្ខិតបង្ខំ គំរាមកំហែង និងទាមទារកាន់កាប់ផ្នែកភាគច្រើនលើសលប់នៃសមុទ្រចិនខាងត្បូង។ ទង្វើរបស់រដ្ឋាភិបាលចិនបន្តធ្វើឲ្យអន្តរាយដល់ប្រព័ន្ធរៀបរយអន្តរជាតិដែលផ្អែកលើច្បាប់ និងគំរាមកំហែងដល់អធិបតេយ្យភាពរបស់ប្រទេសនានា»។
អ្នកស្រី Harris បានបញ្ជាក់យ៉ាងច្បាស់ថា ការប្រឡូករបស់សហរដ្ឋអាមេរិកនៅក្នុងតំបន់អាស៊ីអាគ្នេយ៍ (Southeast Asia) និងតំបន់ឥណ្ឌូប៉ាស៊ីហ្វិក «គឺមិនមែនប្រឆាំងនឹងប្រទេសណាមួយ ឬក៏ធ្វើឡើងដើម្បីឲ្យប្រទេសណាមួយជ្រើសរើសរវាងប្រទេសណានោះឡើយ។ ផ្ទុយទៅវិញ ការប្រឡូករបស់សហរដ្ឋអាមេរិក គឺដើម្បីជំរុញទៅមុខនូវចក្ខុវិស័យសុទិដ្ឋិនិយមដែលសហរដ្ឋអាមេរិកមានសម្រាប់ការចូលរួម និងការសហការនៅក្នុងតំបន់នេះ»។
ដើម្បីសម្រេចឲ្យបាននូវគោលបំណងនេះ សហរដ្ឋអាមេរិកប្ដេជ្ញាពង្រឹងភាពជាដៃគូសំខាន់ៗរបស់ខ្លួននៅក្នុងតំបន់ទាំងទ្វេភាគីនិងពហុភាគី តាមរយៈសមាគមអាស៊ាន (ASEAN) ក្រុមប្រទេស Quad និងភាពជាដៃគូមេគង្គ-សហរដ្ឋអាមេរិក (Mekong-US Partnership)។
អ្នកស្រីអនុប្រធានាធិបតី Harris បានប្រកាសថា សហរដ្ឋអាមេរិកនឹងស្នើធ្វើជាម្ចាស់ផ្ទះកិច្ចប្រជុំវេទិកាកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅឆ្នាំ ២០២៣ ខាងមុខ។
អ្នកស្រីបានសង្កត់ធ្ងន់អំពីតម្រូវការនៅក្នុងការធ្វើការរួមគ្នាលើបញ្ហានានាដូចជាការប្រែប្រួលអាកាសធាតុនិងសុខភាពសាកលលោកជាដើម។ អ្នកស្រី ក៏បានស្នើផងដែរឲ្យបណ្ដាប្រទេសនៅក្នុងតំបន់ឥណ្ឌូប៉ាស៊ីហ្វិកចូលរួមជាមួយសហរដ្ឋអាមេរិកដើម្បីធ្វើយ៉ាងណាឲ្យប្រទេសមីយ៉ាន់ម៉ា ត្រឡប់ទៅរកមាគ៌ាលទ្ធិប្រជាធិបតេយ្យឡើងវិញ។
អ្នកស្រីអនុប្រធានាធិបតី Harris ថ្លែងដូច្នេះថា៖ «ក្នុងរយៈពេលជាច្រើនឆ្នាំចាប់ពីពេលនេះតទៅ ខ្ញុំសង្ឃឹមថា យើងទាំងអស់គ្នាអាចក្រឡេកមកមើលពេលនេះឡើងវិញនិងនិយាយថា ពេលនេះ គឺជាពេលដែលតំបន់របស់យើងរួមគ្នាដើម្បីសម្រេចឲ្យបាននូវអនាគតដ៏ប្រសើរជាងមុន និងជាពេលដែលយើងចាត់វិធានការដើម្បីធ្វើឲ្យជីវភាពរស់នៅរបស់មនុស្សទូទៅមានភាពប្រសើរឡើង»៕
