តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
អ្នកតំណាងបម្រុងរបស់សហរដ្ឋអាមេរិកសម្រាប់កិច្ចការនយោបាយពិសេសប្រចាំនៅអង្គការសហប្រជាជាតិលោក Robert Wood បានប្រកាសថា៖ ប្រទេសស៊ូដង់គឺស្ថិតនៅចំណុចវិបត្តិមួយដោយសារតែ«សង្រ្គាមគ្មានន័យនេះ»។
លោក Robert Wood បានថ្លែងថា៖ «ទុរ្ភិក្សនេះត្រូវបានប្រកាសជាផ្លូវការនៅក្នុងជំរំ Zamzam ដែលជាជំរំសម្រាប់ជនផ្លាស់ទីលំនៅនៅក្នុងប្រទេសដែលស្ថិតនៅក្នុងតំបន់ El Fasher នៃរដ្ឋ North Darfur ជាទីកន្លែងដែលមនុស្សជាង ៥០០.០០០ នាក់កំពុងជ្រកពួន។ អ្នកជំនាញសង្ស័យថា គ្រោះទុរ្ភិក្សនេះក៏កំពុងកើតឡើងនៅក្នុងជំរំ Abu Shouk និងជំរំ Al Salam IDP ដែលជាជំរំសម្រាប់មនុស្សគ្មានទីកន្លែងរស់នៅនៅក្នុងប្រទេសដែលស្ថិតនៅក្បែរនោះផងដែរ»។
លោក Robert Wood បានថ្លែងបន្តថា៖ «គ្រួសារដែលភៀសខ្លួនចេញពីអំពើហិង្សាដ៏គួរឱ្យរន្ធត់បានជួបប្រទះភាពស្រេកឃ្លានជាច្រើនខែមកហើយ។ ក្មេងៗបានហូបដី និងស្លឹកឈើ។ ហើយជារៀងរាល់ថ្ងៃទារកបានស្លាប់ដោយសារភាពស្រេកឃ្លាន។ ហើយទោះបីជាមានជំនួយមនុស្សធម៌ក៏ដោយ ក៏កងកម្លាំងប្រដាប់អាវុធស៊ូដង់ឬ SAF និងកងឯកភាពប្រតិព័ទ្ធ (Rapid Support Forces) ឬ RSF បានសុខចិត្តឱ្យប្រជាជនស៊ូដង់ជួបប្រទះភាពស្រេកឃ្លានដោយការបិទច្រករបៀងមនុស្សធម៌»។
លោក Robert Wood ថ្លែងបន្ថែមថា៖ «ការណ៍នេះរាប់បញ្ចូលទាំងកងកម្លាំងប្រដាប់អាវុធស៊ូដង់ (SAF) ដែលបានដាក់កំហិតលើបុគ្គលិកធ្វើការផ្នែកមនុស្សធម៌មិនឱ្យបង្កើនការផ្គត់ផ្គង់តាមរយៈច្រកព្រំដែន Adré ដ៏សំខាន់ ដែលនៅមិនឆ្ងាយពីជំរំ Zamzam នោះទេ។ រឿងនេះ គឺដូចដែលពួកគេបានរារាំងចលនាជំនួយពីច្រកព្រំដែន Adré ដែរ ដោយផ្តល់កំណត់ទូតធម្មតាតែមួយ។ កងកម្លាំងប្រដាប់អាវុធស៊ូដង់ និងរដ្ឋាភិបាលក្រុង Port Sudan អាចបញ្ចប់ការរារាំងនេះនៅថ្ងៃនេះបាន»។
យោងតាមក្រុមគ្រូពេទ្យគ្មានព្រំដែន Doctors Without Borders បានឱ្យដឹងថា ម្ហូបអាហារមានគ្រប់គ្រាន់សម្រាប់តែកុមារដែលខ្វះអាហារូបត្ថម្ភនៅក្នុងជំរំ Zamzam រយៈពេលពីរសប្តាហ៍ទៀតប៉ុណ្ណោះ។ ក្រុមគ្រូពេទ្យគ្មានព្រំដែនត្រូវតែកំណត់ចំនួនកុមារដែលអាចទទួលបានម្ហូបអាហារនេះ ពីព្រោះកងឯកភាពប្រតិព័ទ្ធ (RSF) បានរាំងខ្ទប់រថយន្តដែលដឹកគ្រឿងផ្គត់ផ្គង់។
លោក Robert Wood បានថ្លែងទៀតថា៖ «ចាប់តាំងពីជម្លោះនេះបានចាប់ផ្តើម សហរដ្ឋអាមេរិកបានអំពាវនាវឱ្យសហគមន៍អន្តរជាតិយកចិត្តទុកដាក់បន្ថែមទៀត ផ្តល់ឱ្យកាន់តែច្រើន និងធ្វើការបន្ថែមទៀត»។ សហរដ្ឋអាមេរិកបានដឹកនាំដោយធ្វើជាឧទាហរណ៍ដោយផ្តល់ជំនួយជាង១ពាន់៦រយលានដុល្លារដល់ប្រទេសស៊ូដង់ និងប្រទេសជិតខាងចាប់តាំងពីជម្លោះនេះបានចាប់ផ្តើមនៅឆ្នាំ២០២៣។
លោក Robert Wood បានថ្លែងបន្តទៀតថា៖ «ក៏ប៉ុន្តែនៅពេលនេះ កងកម្លាំងប្រដាប់អាវុធស៊ូដង់ និងកងឯកភាពប្រតិព័ទ្ធ ត្រូវតែដករបាំងចេញដើម្បីអាចឱ្យជំនួយ ម្ហូបអាហារ ទឹក និងឱសថដែលត្រូវការចាំបាច់ ហូរចូលដោយសេរី និងរួមទាំងនៅចំណុចចូលជាច្រើន ឆ្លងកាត់ព្រំដែន និងខ្សែជម្លោះផងដែរ។ ពួកគេក៏ត្រូវចូលរួមក្នុងការចរចាអំពីបទឈប់បាញ់គ្នាប្រកបដោយលក្ខណៈស្ថាបនា និងបំបាត់សំឡេងកាំភ្លើងជារៀងរហូតទៅ»។
សហរដ្ឋអាមេរិកបានជំរុញឱ្យលោកឧត្តមសេនីយ៍ Abdel Fattah al-Burhan និងលោក Hemedti ចូលរួមកិច្ចចរចាអំពីបទឈប់បាញ់ដែលនឹងធ្វើឡើងនៅក្នុងប្រទេសស្វីសនៅថ្ងៃទី១៤ ខែសីហា ខាងមុខនេះ។
លោក Wood បាននិយាយទៀតថា «មិនមានដំណោះស្រាយផ្នែកយោធាចំពោះសង្គ្រាមនេះទេ។ ចំនួនអ្នកស្លាប់កំពុងត្រូវបានវាស់វែងនៅក្នុងសោកនាដកម្មនៃការបាត់បង់ជីវិតរបស់ជនស៊ីវិល ការផ្លាស់ទីលំនៅរបស់មនុស្សរាប់លាននាក់ចេញពីផ្ទះរបស់ពួកគេ កង្វះអាហារូបត្ថម្ភយ៉ាងខ្លាំង ការរំលោភសេពសន្ថវៈ ការធ្វើទារុណកម្ម និងការប្រព្រឹត្តិអាក្រក់ផ្សេងៗទៀត និងការបោសសម្អាតជាតិសាសន៍»៕
