តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលអាមេរិកាំង
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយនៅក្នុងសន្និសីទសារព័ត៌មានមួយថា សហរដ្ឋអាមេរិកបន្តចាត់វិធានការដើម្បីបន្ថយកម្តៅនៅតំបន់មជ្ឈិមបូព៌ា«ដើម្បីទប់ស្កាត់ការកើនឡើងរបស់អ៊ីរ៉ង់ ដៃគូ និងភ្នាក់ងាររបស់អ៊ីរ៉ង់នៅក្នុងតំបន់។ យើងបានកែសម្រួលឥរិយាបថយោធារបស់យើងដើម្បីពង្រឹងការការពារកងកម្លាំងរបស់យើង និងពង្រឹងការប្តេជ្ញាចិត្តរបស់យើងចំពោះការការពារជាតិអ៊ីស្រាអែល និងដើម្បីរក្សាការត្រៀមខ្លួនក្នុងការឆ្លើយតបទៅនឹងឧបទ្ទវហេតុណាមួយ»។
លោក Lloyd Austin បាននិយាយថា៖ «ដើម្បីរក្សាវត្តមានក្រុមនាវាចម្បាំងរបស់យើងនៅតំបន់មជ្ឈិមបូព៌ា ខ្ញុំបានបញ្ជាឱ្យដាក់នាវាចម្បាំងធុន USS Abraham Lincoln ជំនួសនាវាធុន USS Theodore Roosevelt នៅចុងខែនេះ។ ខ្ញុំក៏បានបញ្ជាឱ្យបញ្ជូននាវាចម្បាំង និងនាវាពិឃាតបន្ថែមទៀតដែលមានសមត្ថភាពទប់ទល់នឹងកាំជ្រួចមីស៊ីលទៅកាន់តំបន់នោះ ហើយខ្ញុំបានបញ្ជាឱ្យដាក់ពង្រាយយន្តហោះចម្បាំងផ្សេងទៀតទៅកាន់តំបន់មជ្ឈិមបូព៌ា ដើម្បីពង្រឹងសមត្ថភាពការពារដែនអាកាសរបស់យើងនៅទីនោះ»។
លោក Lloyd Austin បាននិយាយទៀតថា៖ «ការកែសម្រួលឥរិយាបថទាំងនេះ គឺបន្ថែមទៅលើសមត្ថភាពទូលំទូលាយរបស់យើងនៅក្នុងតំបន់ ហើយយើងនៅតែត្រៀមខ្លួនរួចរាល់ក្នុងការដាក់ពង្រាយតាមការជូនដំណឹងភ្លាមៗ ដើម្បីឆ្លើយតបទៅនឹងការគំរាមកំហែងដែលកំពុងវិវត្តដល់ផ្នែកសន្តិសុខរបស់យើង ដៃគូរបស់យើង ឬផលប្រយោជន៍របស់យើង»។
លោក Lloyd Austin បាននិយាយបន្តថា៖ «សហរដ្ឋអាមេរិកនៅតែផ្តោតការយកចិត្តទុកដាក់យ៉ាងខ្លាំងទៅលើការបន្ថយភាពតានតឹងនៅក្នុងតំបន់ ហើយយើងក៏កំពុង ផ្តោតលើការធានាឱ្យមានបទឈប់បាញ់ដែលជាផ្នែកមួយនៃកិច្ចព្រមព្រៀងដោះលែងចំណាប់ខ្មាំងដើម្បីនាំយកចំណាប់ខ្មាំងទាំងអស់មកផ្ទះវិញ និងដើម្បីបញ្ចប់សង្គ្រាមនៅតំបន់ហ្កាហ្សា»។
កាលពីខែមេសា សហរដ្ឋអាមេរិករួមជាមួយនឹងសម្ពន្ធមិត្ត និងដៃគូនានា រួមទាំងប្រទេសអារ៉ាប៊ីសាអូឌីត អេមីរ៉ាតអារ៉ាប់រួម និងហ្ស៊កដានី បានជួយអ៊ីស្រាអែលទប់ទល់នឹងការវាយប្រហារដោយយន្តហោះគ្មានមនុស្សបើកដ៏ច្រើន និងកាំជ្រួចពីប្រទេសអ៊ីរ៉ង់។ ការវាយប្រហាររបស់អ៊ីរ៉ង់បានធ្វើឡើងបន្ទាប់ពីអ៊ីស្រាអែលបានសម្លាប់តាមគោលដៅនូវមេដឹកនាំកងកម្លាំងឆ្មាំបដិវត្តន៍អ៊ិស្លាមអ៊ីរ៉ង់ដែលជាអង្គការទទួលខុសត្រូវចំពោះប្រតិបត្តិការភេរវជននៅក្រៅទឹកដីរបស់របបអ៊ីរ៉ង់។ កាលពីថ្ងៃទី៣១ ខែកក្កដា លោក Ismail Haniyeh មេដឹកនាំកំពូលនៃក្រុមភេរវជនហាម៉ាស់ដែលគាំទ្រដោយអ៊ីរ៉ង់ ដែលបានចាប់ផ្តើមជម្លោះនាពេលបច្ចុប្បន្ននៅតំបន់ហ្កាហ្សាបន្ទាប់ពីក្រុមហាម៉ាស់បានបើកការវាយប្រហារភេរវកម្មដ៏ឃោរឃៅទៅលើអ៊ីស្រាអែល ត្រូវបានគេធ្វើឃាតនៅទីក្រុងតេហេរ៉ង់។
អ៊ីរ៉ង់បានប្តេជ្ញាសងសឹក ហើយភាពតានតឹងបានកើនឡើង។ សហរដ្ឋអាមេរិកកំពុងធ្វើការដើម្បីបញ្ឈប់ជម្លោះកុំឱ្យកើនឡើង ដោយមិនត្រឹមតែពង្រឹងជំហរការការពារខ្លួននៅក្នុងតំបន់ប៉ុណ្ណោះទេ គឺថែមទាំងលើកទឹកចិត្តអ៊ីស្រាអែល និងក្រុមហាម៉ាស់ឱ្យយល់ព្រមលើសំណើបទឈប់បាញ់ដែលពួកគេបានចរចាអស់រយៈពេលពីរខែកន្លងមកនេះទៀតផង។
តាមរយៈការរារាំងនិងតាមផ្នែកការទូតនេះ សហរដ្ឋអាមេរិកកំពុងផ្ញើសារយ៉ាងច្បាស់លាស់មួយថា៖ ត្រូវតែបញ្ចៀសជម្លោះកាន់តែទូលំទូលាយនៅតំបន់មជ្ឈិមបូព៌ា៕
