តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ជាងមួយឆ្នាំក្រោយមក បន្ទាប់ពីប្រទេសរុស្ស៊ីបានឈ្លានពានទាំងទទឹងទិសលើប្រទេសអ៊ុយក្រែន វាគឺជាការសំខាន់នៅក្នុងការរំឭកថា សហរដ្ឋអាមេរិកបន្តតាមមាគ៌ាពីរយ៉ាងជាប់លាប់ដែលប្រទេសរុស្ស៊ីអាចជ្រើសរើសបាន។ នេះបើតាមការបញ្ជាក់របស់អ្នកស្រី Karen Donfried ឧបការីរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអឺរ៉ុបនិងអាស៊ីអឺរ៉ុប។
អ្នកស្រីថ្លែងដូច្នេះថា៖ «មាគ៌ាមួយគឺការចរចានិងការទូត ហើយមាគ៌ាមួយទៀតគឺការបង្កើនសង្គ្រាមរបស់រុស្ស៊ីដែលនឹងមានផលវិបាកដ៏ធំ។ សហរដ្ឋអាមេរិកនិងអ៊ុយក្រែនបានធ្វើកិច្ចប្រឹងប្រែងដ៏ស្មោះត្រង់ដើម្បីបន្តតាមមាគ៌ាទីមួយដែលនោះគឺការចរចានិងការទូត ហើយកាលពីថ្ងៃទី ២៤ ខែកុម្ភៈឆ្នាំមុន [ប្រធានាធិបតីរុស្ស៊ីលោក Vladimir] Putin បានជ្រើសរើសធ្វើសង្គ្រាមដោយអកុសល និងគួរឱ្យសោកស្ដាយ»។
អ្នកស្រីឧបការីរដ្ឋមន្ត្រី Donfried បាននិយាយថា៖ «លោក Putin បានរំពឹងថានឹងទទួលបានជ័យជម្នះភ្លាមៗ ប៉ុន្តែលោកបានមើលស្រាលជានិច្ចលើការតាំងចិត្តរបស់ប្រជាពលរដ្ឋអ៊ុយក្រែននិងបំណងប្រាថ្នានិងសមត្ថភាពរបស់ពួកគេនៅក្នុងការការពារសេរីភាពនិងលទ្ធិប្រជាធិបតេយ្យរបស់ខ្លួន»។ ការឈ្លានពានរបស់រុស្ស៊ីលើអ៊ុយក្រែនគឺគ្មានហេតុផលត្រឹមត្រូវនិងខុសច្បាប់ទាំងស្រុង។
សហរដ្ឋអាមេរិកនិងសម្ព័ន្ធមិត្តនិងដៃគូរបស់ខ្លួនបានដាក់ទណ្ឌកម្ម ការត្រួតត្រាលើការនាំចេញ និងការរឹតត្បិតលើទិដ្ឋាការដើម្បីសំដៅលើលោក Putin ធនធានសម្រាប់ធ្វើសង្គ្រាមរបស់លោក និងអ្នកដែលជួយជំរុញផែនការរបស់លោក ក្នុងគោលបំណងតែមួយគត់គឺដើម្បីបញ្ឈប់សង្គ្រាមនេះនិងរារាំងរុស្ស៊ីមិនឱ្យធ្វើដូច្នេះម្ដងទៀតចំពោះប្រទេសជិតខាងមួយទៀត។ នេះបើតាមការប្រកាសរបស់អ្នកស្រីឧបការីរដ្ឋមន្ត្រី Donfried។
អ្នកស្រី Donfried លើកឡើងដូច្នេះថា៖ «សកម្មភាពរបស់លោកប្រធានាធិបតី Putin បានបង្ហាញយ៉ាងច្បាស់ថា លោកគ្មានចំណាប់អារម្មណ៍ក្នុងផ្នែកការទូតទេ។ រុស្ស៊ីបានវាយប្រហារដោយគ្រាប់ផ្លោងម្ដងហើយម្ដងទៀតចំសាលារៀន មន្ទីរពេទ្យ ព្រះវិហារគ្រិស្តសាសនា អគារស្នាក់នៅ និងហេដ្ឋារចនាសម្ព័ន្ធសំខាន់ៗ [របស់អ៊ុយក្រែន]។ រុស្ស៊ីខ្លួនឯងតែម្នាក់គត់អាចបញ្ចប់សង្គ្រាមនេះបាននៅពេលនេះ។ យើងគាំទ្រការអំពាវនាវរបស់ប្រធានាធិបតីអ៊ុយក្រែនលោក Volodymyr Zelenskyy ដែលចង់ឱ្យមានសន្តិភាពដ៏ត្រឹមត្រូវនិងឋិតថេរ គឺសន្តិភាពដែលទទួលស្គាល់អធិបតេយ្យភាពនិងឯករាជ្យភាពរបស់ប្រទេសអ៊ុយក្រែន»។
សហរដ្ឋអាមេរិកនឹងបន្តឈររួមគ្នាជាមួយនឹងប្រទេសអ៊ុយក្រែន និងជួយអ៊ុយក្រែនការពារខ្លួនរហូតមិនថាយូរប៉ុណ្ណានោះទេ។ ប្រសិនបើលោក Putin ឈ្នះ ពិភពលោកអាចនឹងកាន់តែគ្រោះថ្នាក់ជាងមុន ហើយប្រទេសផ្សេងទៀតអាចកាន់តែងាយរងគ្រោះដោយសារភាពគឃ្លើនរបស់រុស្ស៊ីជាបន្តទៀត។
ប្រធានាធិបតីសហរដ្ឋអាមេរិកលោក Joe Biden ជឿថា សហរដ្ឋអាមេរិកនិងសម្ព័ន្ធមិត្តរបស់ខ្លួនគឺមានភាពខ្លាំងក្លាជាងមុនប្រសិនបើរួមកម្លាំងគ្នា។
អ្នកស្រីឧបការីរដ្ឋមន្ត្រី Donfried បាននិយាយថា៖ «តាំងពីថ្ងៃដំបូងនៃសង្គ្រាមបែបគឃ្លើនរបស់រុស្ស៊ីលើអ៊ុយក្រែនមក យើងបានធ្វើការទាក់ទងជាបន្តជាប់រហូតអំពីអ្វីដែលយើងអាចធ្វើទាំងអស់គ្នាដើម្បីធ្វើឱ្យរុស្ស៊ីទទួលខុសត្រូវនិងដាក់ទណ្ឌកម្មចំពោះសង្គ្រាមដ៏ឃោរឃៅរបស់រុស្ស៊ី។ ទោះបីជាយើងតែងតែមិនមានគោលនយោបាយដូចគ្នាក៏ដោយ ក៏យើងមានការតាំងចិត្តដូចគ្នានៅក្នុងការប្រកាន់ខ្ជាប់តាមរបៀបរៀបរយអន្តរជាតិដែលផ្អែកលើច្បាប់ដែលចាក់គ្រឹះលើការគោរពបូរណភាពទឹកដីនិងអធិបតេយ្យភាព»៕
បទវិចារណកថា៖ ការប្ដេជ្ញាចិត្តរួមគ្នាដើម្បីគាំទ្រប្រទេសអ៊ុយក្រែន
រូបឯកសារ៖ ទាហានអ៊ុយក្រែនដែលត្រូវបានបណ្តុះបណ្តាលដោយទាហានអង់គ្លេស និងលីទុយអានី។