តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងកិច្ចប្រជុំមួយកាលពីពេលថ្មីៗនេះ រដ្ឋមន្ត្រីការបរទេសសហរដ្ឋអាមេរិកលោក Antony Blinken និងរដ្ឋមន្ត្រីការបរទេសចក្រភពអង់គ្លេសលោក James Cleverly បានបញ្ជាក់ជាថ្មីអំពីការគាំទ្ររបស់ពួកគេចំពោះប្រទេសអ៊ុយក្រែន នៅពេលដែលអ៊ុយក្រែនការពារខ្លួនពីការវាយប្រហារដ៏ឃោរឃៅរបស់ប្រទេសរុស្ស៊ី។
លោករដ្ឋមន្ត្រី Blinken បានសរសើរការតាំងចិត្តរបស់ចក្រភពអង់គ្លេសនៅក្នុងការបញ្ជូនរថក្រោះ Challenger 2 និងប្រព័ន្ធកាំភ្លើងធំបន្ថែមទៀតឱ្យអ៊ុយក្រែន ដែលនឹងបន្តពង្រឹងកងទ័ពអ៊ុយក្រែនជាបន្តទៀតបន្ថែមពីលើអ្វីដែលសហរដ្ឋអាមេរិកបានផ្ដល់ឱ្យអ៊ុយក្រែន។
លោករដ្ឋមន្ត្រី Blinken ថ្លែងដូច្នេះថា៖ «យើងនៅតែរួបរួមគ្នានៅក្នុងការពង្រឹងជំនួយមនុស្សធម៌របស់យើងចំពោះប្រជាពលរដ្ឋអ៊ុយក្រែន»។
ដើម្បីបញ្ចៀសកុំឱ្យមានមហន្តរាយមនុស្សធម៌ធំជាងនេះ សហរដ្ឋអាមេរិកបានចូលរួមនៅក្នុងការដាក់សម្ពាធសេដ្ឋកិច្ចតាមរយៈការដាក់ទណ្ឌកម្មនិងការត្រួតត្រាការនាំចេញលើរដ្ឋាភិបាលរុស្ស៊ី ក្នុងគោលបំណងដើម្បីធ្វើឱ្យរុស្ស៊ីគ្មានធនធានដែលខ្លួនត្រូវការដើម្បីទំនុកបម្រុងដល់ធនធានធ្វើសង្គ្រាមរបស់ខ្លួន។
លោករដ្ឋមន្ត្រី Blinken បាននិយាយថា៖ «យើងកំពុងអនុវត្តកិច្ចប្រឹងប្រែងទាំងនេះនិងកិច្ចប្រឹងប្រែងផ្សេងទៀតដើម្បីធ្វើឱ្យអ៊ុយក្រែនស្ថិតក្នុងជំហរដ៏ខ្លាំងក្លាបំផុតមួយដែលអាចទៅរួចនៅពេលដែលមានការចរចា ដើម្បីឱ្យអាចមានសន្តិភាពមួយដែលមានយុត្តិធម៌និងឋិតថេរយូរអង្វែង»។
ទាក់ទិននឹងបញ្ហាអ៊ីរ៉ង់ សហរដ្ឋអាមេរិកឈរជាមួយនឹងរដ្ឋាភិបាលចក្រភពអង់គ្លេសនៅក្នុង «ការថ្កោលទោសការប្រហារជីវិតរបស់រដ្ឋាភិបាលអ៊ីរ៉ង់លើលោក Alireza Akbari ដែលមានសញ្ជាតិអ៊ីរ៉ង់និងចក្រភពអង់គ្លេស ដែលការប្រហារជីវិតនេះគឺមានលក្ខណៈនយោបាយនិងអយុត្តិធម៌។ ការប្រហារជីវិតនេះគឺជាលំនាំមួយនៃការរំលោភបំពានដែលប្រព្រឹត្តិឡើងដោយរបបដឹកនាំអ៊ីរ៉ង់ ដែលមានដូចជាការឃុំឃាំង ការធ្វើទារុណកម្ម ការបង្ខំឱ្យសារភាព និងការប្រហារជីវិតដោយអយុត្តិធម៌ជាដើម»។ នេះបើតាមការបញ្ជាក់របស់លោករដ្ឋមន្ត្រី Blinken។
លោក Blinken លើកឡើងដូច្នេះថា៖ «យើងនឹងបន្តធ្វើការជាមួយនឹងចក្រភពអង់គ្លេសនិងសម្ព័ន្ធមិត្តនិងដៃគូរបស់យើងដទៃទៀតដើម្បីធ្វើឱ្យថ្នាក់ដឹកនាំអ៊ីរ៉ង់ទទួលខុសត្រូវចំពោះការរំលោភបំពានទាំងនេះនិងការរំលោភបំពានផ្សេងៗទៀត។ យើងនឹងបន្តឈរជាមួយនឹងពលរដ្ឋអ៊ីរ៉ង់ដ៏អង់អាចក្លាហាន ដែលងើបឈរការពារសិទ្ធិជាមូលដ្ឋានរបស់ខ្លួនដែលដឹកនាំដោយស្ត្រីវ័យក្មេង នៅក្នុងការប្រឈមនឹងការជិះជាន់សង្កត់សង្កិនដ៏សាហាវ»។
សាធារណរដ្ឋប្រជាមានិតចិនក៏ជាប្រធានបទមួយផងដែរនៃការពិភាក្សាគ្នានេះ។ លោករដ្ឋមន្ត្រី Blinken «បានស្វាគមន៍ការតាំងចិត្តរបស់ចក្រភពអង់គ្លេសនៅក្នុងការពង្រឹងការប្រឡូករបស់ខ្លួននៅក្នុងតំបន់ឥណ្ឌូប៉ាស៊ីហ្វិក»។ លោកបានបញ្ជាក់ថា៖ «យើងទន្ទឹងរង់ចាំបន្តការប្រឹក្សាយោបល់ដ៏ជិតស្និទ្ធរបស់យើងលើបញ្ហាជាច្រើននៅក្នុងតំបន់ ដែលក្នុងនោះរួមមានទាំងការរក្សាសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ផងដែរ»។
ទាក់ទិននឹងប្រធានបទអំពីអៀរឡង់ខាងជើង លោករដ្ឋមន្ត្រី Blinken បានបញ្ជាក់អះអាងអំពីការគាំទ្ររបស់សហរដ្ឋអាមេរិកចំពោះកិច្ចព្រមព្រៀង Belfast Good Friday។ សហរដ្ឋអាមេរិកជឿថា ដំណោះស្រាយតាមរយៈការចរចាត្រូវតែមានដើម្បីអនុវត្តពិធីសារអៀរឡង់ខាងជើងដែលគ្រប់ភាគីទាំងអស់អាចទទួលយកបាន។ កាលពីពេលថ្មីៗនេះ ចក្រភពអង់គ្លេសនិងសហភាពអឺរ៉ុបបានធ្វើឱ្យមានការវិវឌ្ឍទៅមុខគួរសមចំពោះដំណោះស្រាយតាមរយៈការចរចានេះ។
លោករដ្ឋមន្ត្រី Blinken បាននិយាយថា សហរដ្ឋអាមេរិកនិងចក្រភពអង់គ្លេស «កំពុងបន្ថែមជំពូកថ្មីមួយទៀតទៅនឹងប្រវត្តិសាស្ត្រដ៏វែងអន្លាយនៃទំនាក់ទំនងពិសេសនេះនៅចំពេលដែលសំខាន់និងរស់រវើកជាងពេលណាៗទាំងអស់»៕
