តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ថ្ងៃទី២២ ខែមេសា ជាទិវាភពផែនដី ដែលជាឱកាសមួយដើម្បីអបអរសាទរធម្មជាតិ ត្រិះរិះពិចារណាអំពីផលប៉ះពាល់ដែលមនុស្សធ្វើដល់បរិស្ថានរបស់យើង និងដើម្បីបញ្ជាក់ជាថ្មីអំពីការគាំទ្ររបស់យើងដល់ការការពារបរិស្ថាន។
ការរំឭកទិវានេះមានឫសគល់ពីការខឹងសម្បាជាសាធារណៈដល់ការចុះថមថយនៃបរិស្ថាននៅទូទាំងប្រទេស និងដល់ការខ្វះឆន្ទៈនយោបាយដើម្បីដោះស្រាយបញ្ហានេះ។
លោក Gaylord Nelson ដែលធ្លាប់ជាសមាជិកព្រឹទ្ធសភាសហរដ្ឋអាមេរិក និងជាសកម្មជនបរិស្ថានបានសន្និដ្ឋានថា នឹងគ្មានចំណាត់ការទេរហូតដល់ពេលណាមានមនុស្សគ្រប់គ្រាន់បង្ហាញកំហឹងរបស់ពួកគេ។ លោកក៏បានចាត់ចែងឱ្យមានទិវាភពផែនដីជាលើកដំបូងកាលពីថ្ងៃទី២២ ខែមេសា ឆ្នាំ១៩៧០។
លោកស្រី Monica Medina ឧបការីរដ្ឋមន្ត្រីការបរទេសសហរដ្ឋអាមេរិកខាងមហាសមុទ្រ បរិស្ថានអន្តរជាតិនិងកិច្ចការវិទ្យាសាស្ត្របាននិយាយថា៖ «នេះជាពេលវេលាសំខាន់មួយសម្រាប់ប្រទេសយើងដើម្បីពិចារណានិងធ្វើសកម្មភាពបន្ថែមដើម្បីថែរក្សាបរិស្ថាន»។
លោកស្រី Medina បាននិយាយថា៖ «ទិវាភពផែនដីជាពេលវេលាសំខាន់មួយសម្រាប់យើងទាំងអស់គ្នាគិតអំពីថា តើបរិស្ថានសំខាន់បែបណាដល់គុណភាពជីវិត ដល់សេដ្ឋកិច្ច និងដល់សុខភាពមនុស្ស...ប្រធានបទនៅឆ្នាំនេះគឺការវិនិយោគក្នុងភពផែនដីរបស់យើងដែលសំខាន់ជាងមុន។ សហរដ្ឋអាមេរិកធ្វើការខ្លាំងណាស់ដើម្បីបង្កើនការបណ្តាក់ទុនក្នុងផ្នែកផ្សេងៗដូចជាឧទ្យាននិងតំបន់ត្រូវការពារ គុណភាពទឹក ការថែរក្សា គឺអ្វីៗទាំងអស់ដែលនឹងកែលម្អគុណភាពជីវិត កែប្រែហេដ្ឋារចនាសម្ព័ន្ធថាមពលរបស់យើង និងគោលដៅខាងថាមពលទាំងអស់របស់យើងដែលអាចប្រើបានជាថ្មីច្រើនជាងមុន»។
លោកស្រីឧបការីរដ្ឋមន្ត្រីការបរទេស Medina ដែលបម្រើការជាប្រេសិតពិសេសខាងជីវៈចម្រុះនិងប្រភពទឹកដែរនោះបានថ្លែងថា៖ «ទាំងអស់នេះនឹងនាំឱ្យមានផលប្រយោជន៍ច្រើនសម្រាប់គុណភាពជីវិត តែក៏កែលម្អការងារ និងសេដ្ឋកិច្ចផងដែរ។ តំបន់ត្រូវការពារថ្មីៗ ទាំងនៅលើដីនិងក្នុងមហាសមុទ្រ...ជាវិធីសំខាន់ៗដែលរដ្ឋាភិបាលធ្វើឱ្យមានការជឿនលឿនក្នុងការថែទាំភពផែនដីរបស់យើង និងបរិស្ថានរបស់យើង»។
លោកស្រី Medina បានថ្លែងថា៖ «យើងបណ្តាក់ទុនក្នុងហេដ្ឋារចនាសម្ព័ន្ធបៃតងដើម្បីធ្វើឱ្យឆ្នេរសមុទ្រយើងនិងប្រទេសយើងមានភាពធុនជាងមុននឹងការប្រែប្រួលធាតុអាកាសនិងអាកាសធាតុអាក្រក់ខ្លាំង។ ហើយប្រាក់កាសទាំងអស់ដែលយើងចំណាយក្នុងវិស័យហេដ្ឋារចនាសម្ព័ន្ធ គឺសម្រាប់កែលម្អហេដ្ឋារចនាសម្ព័ន្ធក្នុងវិធីដែលនាំឱ្យមានប្រយោជន៍ច្រើនជាងមុនខាងបរិស្ថាន។ ហើយ...យើងកែប្រែហេដ្ឋារចនាសម្ព័ន្ធថាមពលរបស់យើងដើម្បីពឹងពាក់ច្រើនជាងមុនលើថាមពលអាចប្រើជាថ្មីបានដែលស្អាត និងមិនប៉ះពាល់ដល់បរិស្ថាន»។
នៅក្នុងទិវាភពផែនដី ចូរយើងចាំថា បរិស្ថានរបស់យើងកំណត់គុណភាពនៃការរស់រានមានជីវិតរបស់យើង។ លោកស្រីឧបការីរដ្ឋមន្ត្រីការបរទេស Medina បានពោលថា៖ «ប្រសិនបើយើងគ្មានបរិស្ថានស្អាតនិងល្អប្រសើរទេ យើងប្រាកដជាមិនអាចធុននឹងខ្លួនយើងបានទេ ហើយមិនអាចរស់ដោយមានគុណភាពជីវិតដែលយើងចង់មាននោះឡើយ»៕