តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
ដើម្បីឱ្យមានសន្តិភាព ប្រជាពលរដ្ឋទាំងអស់ត្រូវតែទទួលបានអត្ថប្រយោជន៍ស្មើៗគ្នាពីការអភិវឌ្ឍ។ ជាការពិតណាស់ ការកសាងសន្តិភាពប្រកបដោយចិរភាពតម្រូវឱ្យមានភាពចុះសម្រុងគ្នានៅក្នុងការដោះស្រាយបញ្ហាជាច្រើន រួមទាំងការអភិវឌ្ឍផ្នែកសេដ្ឋកិច្ច គុណភាពជីវិត សិទ្ធិមនុស្សនិងសេចក្តីថ្លៃថ្នូរ ការជឿទុកចិត្តលើរដ្ឋាភិបាល និងរារាំងមិនឱ្យមានអំពើហិង្សាក្នុងគោលដៅដើម្បីបញ្ចប់អំពើហិង្សា។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ អ្នកស្រី Linda Thomas-Greenfield បានថ្លែងថា៖ «នៅពេលដែលមនុស្សទាំងអស់នៅក្នុងប្រទេសមួយមិនអាចទទួលបានអត្ថប្រយោជន៍ពីការអភិវឌ្ឍន៍ស្មើៗគ្នា ឬនៅពេលដែលពួកគេមិនអាចអនុវត្តសិទ្ធិមនុស្សជាមូលដ្ឋានរបស់ពួកគេបានទេនោះ ហានិភ័យនៃការកើតមានជម្លោះហិង្សានឹងកើនឡើង។ ការធ្វើសកម្មភាពគឺជារឿងចាំបាច់ ពីព្រោះយើងបានឃើញរួចទៅហើយថា មានការលំបាកយ៉ាងណាក្នុងការចាត់វិធានការ បន្ទាប់ពីសង្គ្រាមបានផ្ទុះឡើងនោះ។ ជាឧទាហរណ៍ ដូចអ្វីដែលកំពុងកើតមាន គឺអសន្តិសុខស្បៀងអាហារសកល។ យើងដឹងហើយថា សង្គ្រាមគឺជាមូលហេតុចម្បងដែលនាំឱ្យមានភាពស្រេកឃ្លាន។ ក៏ប៉ុន្តែយើងក៏ដឹងដែរថា ភាពស្រេកឃ្លានជាកត្តាជំរុញឱ្យមានជម្លោះ។ វាជាការងាររបស់យើងក្នុងការបង្អាក់វដ្តនោះ»។
អ្នកស្រី Thomas-Greenfield បានថ្លែងទៀតថា៖ «នៅឆ្នាំ២០២២ សហរដ្ឋអាមេរិកមានមោទនភាពក្នុងការផ្តល់នូវចំនួនជាងពាក់កណ្តាលនៃថវិការបស់កម្មវិធីស្បៀងអាហារពិភពលោក។ ក៏ប៉ុន្តែ យើងមិនគ្រាន់តែឆ្លើយតបទៅនឹងគ្រោះទុរ្ភិក្សនាពេលបច្ចុប្បន្ននេះប៉ុណ្ណោះទេ យើងក៏ត្រូវធ្វើការសហការគ្នាដើម្បីរារាំងមិនឱ្យវាកើតមានឡើងទៀតនៅក្នុងពេលអនាគត មិនថាការជួយអភិវឌ្ឍដំណាំដែលសម្របទៅតាមអាកាសធាតុនិងការអនុវត្តផ្នែកកសិកម្ម ឬក៏ជួយកសិករជាលក្ខណៈគ្រួសារឱ្យទទួលបានសិទ្ធិទទួលបានដីធ្លី ចំណេះដឹង និងការគាំទ្រផ្នែកហិរញ្ញវត្ថុស្មើៗគ្នានោះឡើយ»។
យោងតាមអគ្គលេខាធិការអង្គការសហប្រជាជាតិលោក Antonio Guterres ប្រទេសកំពុងអភិវឌ្ឍន៍កំពុងប្រឈមនឹង«វិបត្តិធំៗ» ដោយក្នុងនោះរួមមានទាំងបំណុលយ៉ាងច្រើនសម្បើម ឧបសគ្គផ្នែកហិរញ្ញវត្ថុរបស់រដ្ឋាភិបាល និងសមត្ថភាពក្នុងការជ្រើសរើសផ្នែកដែលត្រូវបែងចែកមូលនិធិ និងការកើនឡើងអតិផរណា។
អ្នកស្រី Thomas-Greenfield បានថ្លែងទៀតថា៖ «នៅពេលដែលប្រទេសដែលមានសេដ្ឋកិច្ចធំៗនៅក្នុងពិភពលោកចាត់ចែងហិរញ្ញប្បទានសម្រាប់ការអភិវឌ្ឍ វាជារឿងចាំបាច់ដែលយើង… ត្រូវទប់ស្កាត់ ជាជាងចូលរួមចំណែកឱ្យមានបំណុលវ័ណ្ឌក និងភាពចលាចលដែលបង្កឡើងដោយបំណុល»។
អ្នកស្រី Thomas-Greenfield បានថ្លែងទៀតថា៖ «សហរដ្ឋអាមេរិកកំពុងធ្វើការតាមរយៈសម្ព័ន្ធភាពទូលំទូលាយដើម្បីវិវឌ្ឍធនាគារអភិវឌ្ឍន៍ពហុភាគី និងចំណាយទឹកប្រាក់រាប់រយពាន់លានដុល្លារសម្រាប់លទ្ធភាពក្នុងការទទួលបានហិរញ្ញប្បទានប្រកបដោយសុវត្ថិភាព និងចិរភាព ជាពិសេសសម្រាប់ប្រទេសក្រីក្របំផុត»។
អ្នកស្រី Thomas-Greenfield បានថ្លែងបន្ថែមទៀតថា៖ «យើងត្រូវកំណត់ចំណុចអស្ថិរភាព កន្លែងដែលខ្វះការអភិវឌ្ឍនិងខ្វះសេរីភាពមូលដ្ឋាន និងកន្លែងដែលបង្កើនហានិភ័យនៃជម្លោះ»។
អ្នកស្រី Thomas-Greenfield បានថ្លែងទៀតថា៖ «ខណៈពេលដែលយើងប្រារព្ធខួបលើកទី៧៥ នៃសេចក្តីប្រកាសជាសកលស្តីពីសិទ្ធិមនុស្ស យើងត្រូវធ្វើឱ្យប្រាកដថា ការអភិវឌ្ឍប្រកបដោយចិរភាពគឺផ្អែកលើគោលការណ៍នៃឯកសារគ្រឹះនេះ។ យើងទាំងអស់គ្នាសុទ្ធតែមានចំណែក ដូច្នេះយើងទាំងអស់គ្នាត្រូវតែធ្វើការដើម្បីធ្វើឱ្យមនុស្សគ្រប់រូបទទួលបានប្រយោជន៍ស្មើៗគ្នា។ ដូច្នេះទីបំផុតយើងអាចយល់ដឹងពីចក្ខុវិស័យនៃពិភពលោកមួយដែលគ្មានជម្លោះ។ អនាគតកូនចៅរបស់យើងអាស្រ័យលើរឿងនេះ»៕
