តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
ពួកសកម្មជនគាំទ្រលទ្ធិប្រជាធិបតេយ្យនៃប្រទេសគុយបា នៅតែប្តេជ្ញារំដោះប្រទេសជាតិជាកោះរបស់ពួគគេពីការសង្កត់សង្កិន ទោះជាត្រូវរដ្ឋាភិបាលបង្ក្រាបយ៉ាងខ្លាំងក៏ដោយ។
ចាប់ផ្តើមពីថ្ងៃទី១១ ខែកក្កដា ប្រជារាស្ត្រគុយបារាប់ពាន់នាក់នៅក្នុងក្រុងរាប់សិបនៅទូទាំងប្រទេស បានដើរធ្វើបាតុកម្មតាមផ្លូវទាមទារដោយសន្តិវិធីឱ្យមានការគោរពសិទ្ធិមនុស្ស និងសិទ្ធិជាមូលដ្ឋានរបស់ពួកគេ។ ជាការឆ្លើយតប កងកម្លាំងសន្តិសុខគុយបា បានបង្ក្រាបយ៉ាងឃោរឃៅទៅលើក្រុមបាតុករ ចាប់ខ្លួនបាតុកររាប់រយនាក់ដោយសារពួកគេគ្រាន់តែប្រើសិទ្ធិពួកគេក្នុងការសម្តែងមតិនិងជួបជុំគ្នាដោយសេរី។ តាំងពីពេលនោះមក ពួកបាតុករនិងក្រុមអ្នកគាំទ្រសិទ្ធិមនុស្ស ត្រូវបានកាត់ទោសក្នុងដំណើរការគ្មានការធានារ៉ាប់រងអំពីការកាត់ក្តីដោយយុត្តិធម៌ទេ។ ចាប់ពីខែកញ្ញាមក ក្រុមសិទ្ធិមនុស្ស Cubalex បាននិយាយថា មានរបាយការណ៍១ពាន់ ៦៧ អំពីការចាប់ខ្លួនមនុស្ស ហើយពាក់ណ្តាលនៃចំនួននេះ ត្រូវបានឃុំឃាំងស្រេចហើយ ដោយមានរួមបញ្ចូលទាំងអនីតិជនជាងដប់នាក់ផងដែរ។ គេរាយការណ៍ថា ជនខ្លះក្នុងបណ្តាអ្នកជាប់ឃុំឃាំងទាំងនេះ ត្រូវបានរំលោភលើរាងកាយនៅពេលឋិតក្នុងការឃុំឃាំងរបស់របបគ្រប់គ្រងនេះ។ អ្នកត្រូវឃាត់ខ្លួនខ្លះនៅតែជាប់ឃុំឃាំង ឬត្រូវឃុំឃាំងដោយគ្មានការចោទប្រកាន់ជាផ្លូវការទេ។ ចំណែកឯជនឯទៀតវិញ រដ្ឋាភិបាលគុយបាបន្ថែមទោសជាប់ពន្ធនាគារពី៦ទៅ ១២ឆ្នាំ ដោយសារពួកគេគ្រាន់តែបានចូលរួមក្នុងបាតកម្មដោយសន្តិវិធីទាំងនោះ។
នៅក្នុងសេចក្តីថ្លែងការណ៍មួយសុំអង្គការសហប្រជាជាតិឱ្យដោះស្រាយបញ្ហានៃប្រទេសគុយបា រដ្ឋមន្ត្រីការបរទេសសហរដ្ឋអាមេរិក លោក Antony Blinken បានគូសបញ្ជាក់អំពី«ការចាំបាច់ជាសាកលដើម្បីគោរពសិទ្ធិមនុស្សរបស់មនុស្សគ្រប់រូប»។ លោកបានបន្ថែមថា «ជាការចាំបាច់ដែលសហគមន៍អន្តរជាតិត្រូវតែនិយាយប្រឆាំងនឹងការសង្កត់សង្កិននិងការចាប់ខ្លួនក្រុមបាតុករគុយបាច្រើននាក់ ទាមទារឱ្យមានការដោះលែងក្រុមជនត្រូវជាប់គុកដោយអយុត្តិធម៌ និងគាំទ្រការប៉ងប្រាថ្នារបស់ប្រជារាស្ត្រគុយបាក្នុងការសម្រេចអនាគតរបស់ពួកគេផ្ទាល់»។
លោករដ្ឋមន្ត្រី Blinken បានសុំដល់រដ្ឋាភិបាលគុយបាក្នុងឋានៈខ្លួនជាសមាជិកមួយនៃក្រុមប្រឹក្សាសិទ្ធិមនុស្សអង្គការសហប្រជាជាតិ «ឱ្យគោរពសិទ្ធិមនុស្សនិងសេរីភាពជាមូលដ្ឋានរបស់ប្រជារាស្ត្រគុយបាដូចដែលមានចែងនៅក្នុងសេចក្តីប្រកាសសាកលស្តីពីសិទ្ធិមនុស្ស»។
លោករដ្ឋមន្ត្រី Blinken បានប្រកាសថា «ប្រជារាស្ត្រគុយបាសក្តិសមមានឱកាសមួយដើម្បីប្រើសិទ្ធិរបស់ពួកគេនិងបញ្ចេញការប៉ងប្រាថ្នារបស់ពួកគេដោយគ្មានការភ័យខ្លចអំពីអំពើហិង្សា ឬការជាប់ពន្ធនាគារ»។ សហរដ្ឋអាមេរិក នឹងបន្តគាំទ្រប្រជារាស្ត្រគុយបា ហើយនឹងបន្តធ្វើសកម្មភាពដើម្បីឧបត្ថម្ភផ្ចុងផ្តើមដល់ការធ្វើឱ្យរដ្ឋាភិបាលគុយបា ទទួលខុសត្រូវខ្ពស់ចំពោះការរំលោភលើសិទ្ធិមនុស្ស៕
