តទៅនេះ គឺជាបទវិចារណកថាដែលឆ្លុះបញ្ចាំងពីទស្សនៈរបស់រដ្ឋាភិបាលសហរដ្ឋអាមេរិក
នៅក្នុងសុន្ទរកថាមួយដែលលោកបានថ្លែងទៅកាន់វិទ្យាស្ថានសន្តិភាពសហរដ្ឋអាមេរិក លោក Jeffrey Feltman ប្រេសិតពិសេសសហរដ្ឋអាមេរិកសម្រាប់តំបន់ស្នែងអាហ្វ្រិកហៅ Horn of Africa បានព្រមានថា សង្គ្រាមក្នុងប្រទេសអេត្យូពី «នឹងមានផលវិបាកជាមហន្តរាយដល់ឯកភាព បូរណភាពដែនដីនិងស្ថិរភាពនៃប្រទេសអេត្យូពី ដល់ទំនាក់ទំនងរបស់អេត្យូពីជាមួយស.រ.អ. និងសហគមន៍អន្តរជាតិផងដែរ» ប្រសិនបើសង្គ្រាមនេះ មានតទៅទៀត។
លោកឯកអគ្គរដ្ឋទូត Feltman បាននិយាយថា ស.រ.អ. មានជំនឿថា ភាគីទាំងអស់ក្នុងសង្គ្រាមនេះ បានរំលោភលើសិទ្ធិមនុស្ស និងបានប្រព្រឹត្តអំពើឃោរឃៅកាន់តែច្រើនឡើង។
លោកបាននិយាយថា៖ «មានរបាយការណ៍គួរឱ្យជឿទុកចិត្ត និងកត់ត្រាទុកជាច្រើនហូរហែពីប្រភពជាច្រើនស្តីអំពីការរំលោភបំពាន និងអំពើឃោរឃៅទាំងនេះ។ មានសេចក្តីរាយការណ៍អំពីការលួចប្លន់ ការបង្ខំមនុស្សឱ្យចេញពីផ្ទះសំបែង ការប្រហារជីវិត ការរំលោភសេពសន្ថវៈ និងអំពើឃោរឃៅខាងភេទ ក្លាយជាឧបករណ៍មួយនៃសង្គ្រាមជាមួយកងកម្លាំងការពារជាតិអេត្យូពីហៅ ENDF កងកម្លាំងការពារ Eritrea កងកម្លាំងពិសេស Amhara និងកងកម្លាំង TPLF តាមកម្រិតខ្លះ»។
ចាប់ពីខែកក្កដាមក រណសិរ្សរំដោះប្រជារាស្ត្រ Tigray ហៅ TPLF បានពង្រីកសង្គ្រាមនេះ ទៅក្នុងរដ្ឋជិតខាង។ ស.រ.អ. បន្តអំពាវនាវឱ្យរណសិរ្ស TPLF ដកថយចេញពីតំបន់ Afar និង Amhara។
លោកឯកអគ្គរដ្ឋទូត Feltman បានថ្លែងថា នៅពេលជាមួយគ្នានេះ រដ្ឋាភិបាលអេត្យូពី បានចាប់ផ្តើមរារាំងមិនឱ្យមានការដឹកជញ្ជូនជំនួយមនុស្សធម៌ និងការដឹកទំនិញពាណិជ្ជកម្មចូលក្នុងតំបន់ Tigray ទេ ហើយការណ៍នោះ នាំឱ្យតំបន់នោះសឹងតែកើតទុរ្ភិក្ស។
លោកបានថ្លែងថា៖ «ដើម្បីបំពេញសេចក្តីត្រូវការជាមូលដ្ឋានរបស់ប្រជារាស្ត្រ Tigray ៧លាននាក់ អ.ស.ប. បាននិយាយច្បាស់លាស់ថា គេត្រូវការការផ្គត់ផ្គង់ស្បៀងជំនួយយ៉ាងតិចណាស់២ពាន់ឡានកាមីញ៉ុង ជារៀងរាល់ខែ។ ចាប់ពីដើមខែកក្កដាមក មានឡាន កាមីញ៉ុង តែ១ពាន់១រយគ្រឿងប៉ុណ្ណោះ បានដឹកជញ្ជូនជំនួយទៅក្នុងតំបន់ Tigray»។
លោកឯកអគ្គរដ្ឋទូត Feltman បានពោលថា មិនត្រូវមានរដ្ឋាភិបាលណាមួយចាត់វិធានការ និងផ្ចុងផ្តើមការអនុវត្តដែលនាំឱ្យមានទុរ្ភិក្សដល់ពលរដ្ឋខ្លួនទេ។ ស.រ.អ. បន្តផ្តល់អាទិភាពដល់ការផ្តល់ជំនួយជួយជីវិតប្រជារាស្ត្រ អេត្យូពីទាំងអស់ ហើយស្នើសុំដល់ភាគីទាំងអស់ក្នុងសង្គ្រាមនេះអនុញ្ញាតឱ្យមានការដឹកជញ្ជូនជំនួយមនុស្សធម៌ពេញលេញទៅដល់ក្រុមជនដែលត្រូវការវត្ថុនានាមានរួមបញ្ចូលប្រេងឥន្ធនៈ ប្រាក់កាស និងស្បៀងផងដែរ។ ស.រ.អ. ក៏ប្រុងប្រៀបដែរដើម្បីដាក់ទណ្ឌកម្មថែមទៀតតាមរយៈបទបញ្ជាប្រតិបត្តិដែលលោកប្រធានាធិបតី Biden បានចុះហត្ថលេខាកាលពីខែកញ្ញាប្រឆាំងនឹងក្រុមជនទាំងឡាយណាដែលបានបង្កើនវិបត្តិនេះ និងរារាំងកិច្ចប្រតិបត្តិការមនុស្សធម៌។ ការដាក់ទណ្ឌកម្មដំបូងតាមរយៈបទបញ្ជាប្រតិបត្តិនេះ ត្រូវបានប្រកាសកាលពីថ្ងៃទី១២ ខែវិច្ឆិកាប្រឆាំងនឹងបុគ្គល៦រូប និងអង្គភាព Eritrean មួយចំនួន។ លោកឯកអគ្គរដ្ឋទូត Feltman បានព្រមានថា «ហើយយើងនឹងដាក់ទណ្ឌកម្មលើភាគីពាក់ព័ន្ធទាំងអស់ថែមទៀត»។
ស.រ.អ. ចង់ឃើញឱ្យមានស្ថិរភាពនិងភាពសំបូររុងរឿងឡើងវិញនៅទូទាំងប្រទេសនេះ ហើយឱ្យប្រទេសអេត្យូពីមានឋានៈឡើងវិញជាមេដឹកនាំមួយក្នុងតំបន់ និងសាកល។ ដើម្បីឱ្យមានលទ្ធផលបែបនេះ គឺតម្រូវឱ្យពួកមេដឹកនាំអេត្យូពី ដាក់អាវុធហើយស្វែងរករូបមន្តមួយសម្រាប់រស់នៅជាមួយគ្នាដោយសន្តិភាព៕
