តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
សហរដ្ឋអាមេរិកបានឡើងធ្វើជាប្រធានក្រុមប្រឹក្សាសន្តិសុខអង្គការសហប្រជាជាតិនៅខែសីហានេះ ហើយបានផ្ដោតភ្លាមៗលើការដោះស្រាយបញ្ហាអសន្តិសុខស្បៀងអាហារពិភពលោក។
រដ្ឋមន្ត្រីការបរទេសសហរដ្ឋអាមេរិកលោក Antony Blinken បាននិយាយថា៖ «ឥឡូវនេះ មនុស្សប្រហែល ២៦០ លាននាក់នៅជុំវិញពិភពលោកកំពុងជួបប្រទះបញ្ហាអសន្តិសុខស្បៀងអាហារធ្ងន់ធ្ងរ»។
លោក Blinken ថ្លែងបន្តថា៖ «បញ្ហាអសន្តិសុខស្បៀងអាហារផ្ទាល់បង្កឱ្យមានជម្លោះនិងចំណាកស្រុកដោយបង្ខំ។ វាបង្អាក់ដល់ការរីកចម្រើនទាំងការរីកចម្រើនផ្លូវកាយនិងការរីកចម្រើនសេដ្ឋកិច្ច។ វាបង្អាក់ដល់ដំណើរវិវឌ្ឍន៍របស់ប្រទេសនិងប្រជាជន»។
លោកបានបន្ថែមថា៖ «នៅជ្រុងម្ខាងទៀតនៃបញ្ហានេះគឺយើងឃើញមានការកើនឡើងនូវការប្រើប្រាស់ស្បៀងអាហារជាអាវុធនៃសង្គ្រាម សម្រាប់ការមានប្រៀប សម្រាប់គោលបំណងនយោបាយនៅក្នុងជម្លោះពីមួយទៅមួយ។ ...យើងទើបនឹងមានប្រទេសចំនួន ៩១ ដែលប្ដេជ្ញានៅក្នុងសេចក្ដីថ្លែងការណ៍រួមមួយដើម្បីបញ្ចប់ការប្រើប្រាស់ស្បៀងអាហារជាអាវុធនៃសង្គ្រាម។ ការប្ដេជ្ញានេះគឺជាការបញ្ជាក់ដ៏មានឥទ្ធិពលមួយ ហើយយើងជំរុញប្រទេសដទៃទៀតឱ្យចូលរួម»។
ករណីនេះគឺបង្ហាញយ៉ាងច្បាស់នៅក្នុងប្រទេសអ៊ុយក្រែន ដែលនៅទីនោះ ប្រទេសរុស្ស៊ី ដែលបានដកខ្លួនចេញពីគម្រោងផ្ដួចផ្ដើមគ្រាប់ធញ្ញជាតិសមុទ្រខ្មៅ (Black Sea Grain Initiative) ដែលជាគម្រោងមួយអនុញ្ញាតឱ្យអ៊ុយក្រែនអាចនាំចេញស្បៀងអាហារបាន បាន «សំដៅវាយប្រហារដោយចេតនាលើឃ្លាំងស្បៀងអាហារនៅក្នុងប្រទេសអ៊ុយក្រែន ដោយបានបំផ្លាញស្បៀងអាហារក៏ដូចជាមធ្យោបាយនៃការផលិតស្បៀងអាហារទាំងនោះផងដែរ»។
ទង្វើរបស់រុស្ស៊ីទាំងនេះជះផលវិបាកធ្ងន់ធ្ងរលើបញ្ហាអសន្តិសុខស្បៀងអាហារនៅជុំវិញពិភពលោក។
លោករដ្ឋមន្ត្រី Blinken បានថ្លែងថា៖ «ក្នុងពេលមួយឆ្នាំកន្លះកន្លងមកនេះ សហរដ្ឋអាមេរិកបានផ្ដល់ជំនួយស្បៀងអាហារបន្ថែមចំនួន ១៤,៥ ពាន់លានដុល្លារទៅឱ្យប្រទេសនានានៅជុំវិញពិភពលោក។ សហរដ្ឋអាមេរិកគឺជាប្រទេសរួមចំណែកច្រើនជាងគេបំផុតចំពោះកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ គឺចំនួន ៥០% នៃថវិកាសរុបរបស់កម្មវិធីស្បៀងអាហារពិភពលោកជារៀងរាល់ឆ្នាំ»។
លោក Blinken បានលើកឡើងបន្តថា៖ «ប៉ុន្តែ សម្រាប់ជំនួយបន្ទាន់ទាំងអស់ដែលយើងកំពុងផ្ដល់ជូន និងប្រទេសដទៃទៀតកំពុងផ្ដល់ជូន គឺវាមិនទាន់គ្រប់គ្រាន់នោះទេ។ អង្គការសហប្រជាជាតិនិងជាពិសេសកម្មវិធីស្បៀងអាហារពិភពលោកបានតាំងចិត្តថា នៅពេលឥឡូវនេះ យើងត្រូវការដោះស្រាយបញ្ហាអសន្តិសុខស្បៀងអាហារសម្រាប់មនុស្សជាង ១០០ លាននាក់នៅជុំវិញពិភពលោក»។
លោកបានបន្ថែមថា៖ «នៅទីបំផុត យើងក៏ត្រូវតែមានទស្សនៈរយៈពេលវែងផងដែរ»។
លោករដ្ឋមន្ត្រី Blinken បានមានប្រសាសន៍ទៀតថា៖ «នៅត្រឹមឆ្នាំ ២០៥០ គេប៉ាន់ប្រមាណថា ប្រជាជននៃភពផែនដីនេះនឹងអាចកើនដល់ចំនួន ១០ ពាន់លាននាក់។ [ដូច្នេះ] តម្រូវការស្បៀងអាហារគឺទំនងជានឹងកើនឡើងចំនួន ៥០% ជាងពេលសព្វថ្ងៃនេះ។ ប៉ុន្តែ ទិន្នផលនានាដែលជាអ្វីដែលកំពុងតែផលិតឡើងគឺកំពុងធ្លាក់ចុះ មិនមែនកើនឡើងនោះទេ»។
លោកបានបញ្ជាក់បន្ថែមថា៖ «យើងត្រូវតែ ហើយយើងកំពុងដោះស្រាយបញ្ហាប្រឈមនេះ។ តាមរយៈកម្មវិធីមួយចំនួនដូចជាកម្មវិធីចក្ខុវិស័យសម្រាប់ដំណាំនិងដីដែលសម្របតាមអាកាសធាតុ (Vision for Adapted Crops and Soil) ដែលជាគម្រោងផ្ដួចផ្ដើមថ្មីរបស់សហរដ្ឋអាមេរិក យើងអាចដាំដំណាំអាហារដែលមានភាពធន់និងមានជីវជាតិជាងមុន។ នេះគឺជាវិធីថ្មីដ៏មានឥទ្ធិពលមួយដើម្បីធ្វើឱ្យមានលទ្ធផលប្រសើរជាងមុនសម្រាប់រយៈពេលវែងនៅក្នុងការធ្វើឱ្យច្បាស់ថាយើងមានសមត្ថភាពនិងផលិតកម្មផ្នែកកសិកម្មខ្លាំងនៅជុំវិញពិភពលោក»៕
បទវិចារណកថា៖ បញ្ហាប្រឈមកើនឡើងលើផ្នែកអសន្តិសុខស្បៀងអាហារពិភពលោក
រូបឯកសារ៖ មនុស្សមួយចំនួនកំពុងរង់ចាំអាហារដោយឥតគិតថ្លៃនៅខាងក្រៅភោជនីយដ្ឋានមួយក្នុងទីក្រុង Ahmedabad ប្រទេសឥណ្ឌា។