აშშ-ის მთავრობის პოზიცია

2022 წლის მარტში, მოსკოვში გამართულ მუნიციპალურ სხდომაზე ალექსეი გორინოვმა - კრასნოსელსკის საკრებულოს თავმჯდომარის მოადგილემ და ადამიანის უფლებათა დამცველმა - დამსწრეებს მოუწოდა, შეხვედრა წუთიერი დუმილით დაეწყოთ. გორინოვს სურდა, პატივი მიეგოთ იმ ბავშვებისა და სხვა ადამიანების ხსოვნისადმი, ვინც უკრაინის წინააღმდეგ რუსეთის მიერ დაწყებულ ომს შეეწირა. ამ კრებიდან სულ რამდენიმე კვირის შემდეგ, გორინოვი გახდა პირველი ადამიანი, რომელიც კრემლმა, ომთან დაკავშირებული საკითხების ცენზურის მიზნით, ახლადშემოღებული კანონის საფუძველზე დააპატიმრა. ერთ-ერთი ბრალდების მიხედვით, გორინოვს ადანაშაულებდნენ იმაში, რომ მან უკრაინაში რუსეთის სრულმასშტაბიან შეჭრას „სპეციალური სამხედრო ოპერაციის“ ნაცვლად, „ომი“ უწოდა.

ალექსეი გორინოვი 2022 წელს გაასამართლეს. მას რუსეთის შეიარაღებულ ძალებზე ყალბი ინფორმაციის გავრცელების ბრალდება დაუმტკიცდა. რუსეთის მოსამართლემ ოლესია მენდელეევამ გორინოვს შვიდი წლით თავისუფლების აღკვეთა მიუსაჯა.

SEE ALSO:

პუტინის ომი ბავშვებთან

2024 წლის 31 დეკემბერს, შეერთებულმა შტატებმა სანქციები დაუწესა მოსამართლე ოლესია მენდელეევას, გორინოვისთვის ამ განაჩენის გამოტანაში შეტანილი წვლილის გამო. მანდელეევას სანქცირება გლობალური “მაგნიტსკის აქტით” განსაზღვრული პროგრამით მოხდა, რომლის სამიზნეც მთელ მსოფლიოში ადამიანის უფლებათა სერიოზული დამრღვევები და კორუფციაში მონაწილეები არიან.

ოფიციალურ განცხადებაში, რომელიც მენდელეევას სანქცირებას შეეხებოდა, შეერთებული შტატების ხაზინის დეპარტამენტმა აღნიშნა, რომ გორინოვის სასამართლო პროცესზე მენდელეევამ, რომელიც ცნობილია ხანგრძლივი და მკაცრი სასჯელის შემცველ განაჩენთა გამოტანით, „უარი თქვა დაცვის მოწმეების ჩვენებათა განხილვაზე და ამტკიცებდა, რომ გორინოვის ‘გამოსწორება’ პატიმრობის გარეშე შეუძლებელი იქნებოდა”. ხაზინის დეპარტამენტის განცხადებაში ასევე საუბარია წინასწარი დაკავების იზოლატორში გორინოვის მიმართ დაფიქსირებულ, ფიზიკური ძალადობის ფაქტებზე და მისთვის სამედიცინო დახმარების აღმოჩენის თხოვნის უარყოფაზე.

„რუსეთის მხრიდან სამართლებრივი სისტემით მანიპულირება ადუმებს განსხვავებული აზრის მქონეთა ხმას და ახშობს სიმართლეს უკრაინის წინააღმდეგ მიმდინარე, რუსეთის გაუმართლებელი ომის თაობაზე”, - აღნიშნა თავის განცხადებაში ბრედლი სმითმა, ტერორიზმისა და ფინანსური დაზვერვის საკითხებში შეერთებული შტატების ხაზინის მდივნის მოადგილის მოვალეობის შემსრულებელმა.

ცალკე გაკეთებულ განცხადებაში, შეერთებული შტატების სახელმწიფო დეპარტამენტის სპიკერმა, მეთიუ მილერმა თქვა: „ამერიკის შეერთებული შტატები სოლიდარულია რუსი ხალხის მიმართ, რომელიც რუსეთის ფედერაციის ხელისუფლების მხრიდან მუქარის, ძალადობის, ანგარიშსწორებისა და პატიმრობის წინაშე იმყოფება, თავის ქვეყანაში საკუთარი უფლებებისა და ფუნდამენტური თავისუფლებების გამოყენების გამო. მოვუწოდებთ, დაუყონებლივ და უპირობოდ გათავისუფლდნენ გორინი და ყველა სხვა, ვინც რუსეთის ფედერაციამ შერჩევით დააკავა. ჩვენ კვლავაც გავაგრძელებთ რუსეთის ფედერაციაში ადამიანის უფლებების სერიოზული დარღვევების გამო ანგარიშვალდებულების დაყენების წახალისებას”.

გაეროს უშიშროების საბჭოში ახლახან გამართულ შეხვედრაზე, რომელიც ბირთვული იარაღის გაუვრცელებლობისა და ირანის საკითხებს ეხებოდა, რობერტ ვუდმა, გაეროში შეერთებული შტატების ალტერნატიულმა წარმომადგენელმა საგანგებო პოლიტიკურ საკითხებში, განაცხადა: „როდესაც გადახედავ ძალებს, რომლებიც დღეს ყველაზე დამანგრეველი და მადესტაბილიზებელი კონფლიქტების უკან დგას, ერთი ქვეყნის სახელს დაინახავ. ეს ისევ და ისევ ირანია”.

მისი თქმით, „ირანი აგრძელებს კონფლიქტებისა და არასტაბილურობის გაღვივებას ახლო აღმოსავლეთში და მსოფლიოს სხვა ნაწილებში. მისი ბირთვული აქტივობაც კვლავ სერიოზული შეშფოთების საგნად რჩება”.

როგორც გაეროს გენერალურმა მდივანმა, ანტონიო გუტიერეშმა განაცხადა, ირანი აფართოებს თავის ბირთვულ პროგრამას, აღნიშნავს რობერტ ვუდი. მან ამის მაგალითად მოიყვანა თეირანის მიერ დამატებითი მოწინავე ცენტრიფუგების დაყენება და უაღრესად გამდიდრებული ურანის უფრო დიდი მოცულობის მარაგის შექმნა.

„ეს ყოველივე კი ხდება ირანის ოფიციალურ პირთა კომენტარების ფონზე, რომლებიც აცხადებენ, რომ ირანმა შესაძლოა შეცვალოს საკუთარი ბირთვული დოქტრინის თაობაზე მიღებული გადაწყვეტილება და შექმნას ბირთვული იარაღი“, - თქვა გაეროში შეერთებული შტატების ალტერნატიულმა წარმომადგენლმა. „ირანის ქმედებები მეტყველებს იმაზე, რომ ის არ არის დაინტერესებული მისი ბირთვული პროგრამის მხოლოდ სამშვიდობო მიზნებით მუშაობის დადასტურებულად წარმოჩენაში. ჩვენ მკაფიოდ უნდა დავგმოთ ამგვარი სახიფათო საქციელი და ის, რომ ირანმა გადასაჭრელ საკითხებზე გაეროს ატომური ენერგიის საერთაშორისო სააგენტოსთან (IAEA) თანამშრომლობა ჩააგდო”.

ვუდმა ასევე ხაზგასმით აღნიშნა: შეერთებულ შტატებს მიაჩნია, რომ დიპლომატია ყველაზე ეფექტიან გადაწყვეტას გვთავაზობს ირანის ბირთვულ პროგრამასთან დაკავშირებული შეშფოთების მოსაგვარებლად:

„მართალია, დიპლომატია საუკეთესო ვარიანტია, მაგრამ შეერთებულმა შტატებმა ასევე ნათლად აჩვენა, რომ ბირთვული ირანი გამოსავალი ვერასდროს იქნება. ჩვენ მზად ვართ, ამ შედეგის უზრუნველსაყოფად, ეროვნული ძალაუფლების ყველა ელემენტი გამოვიყენოთ“.

შეერთებული შტატები ასევე შეშფოთებულია ირანის ბალისტიკური რაკეტებისა და უპილოტო საფრენი აპარატების (დრონების) შეიარაღების პროგრამებით, თქვა რობერტ ვუდმა. ”ჩვენ ვნახეთ, რომ ირანმა ისინი გასულ წელს არაერთხელ გამოიყენა თავისი მეზობლების წინააღმდეგ”. გაეროში შეერთებული შტატების წარმომადგენელმა ასევე ისაუბრა ირანის რეჟიმის მიერ ჰუთებისთვის ბალისტიკური სარაკეტო ტექნოლოგიების მიწოდებაზე, ჰეზბოლას შეიარაღებით მომარაგებაზე და უკრაინის წინააღმდეგ უკანონო ომში გამოსაყენებლად, რუსეთისთვის დრონებისა და მოკლე რადიუსის ბალისტიკური რაკეტების გადაცემაზე.

ვუდმა გაეროს უშიშროების საბჭოს წევრებს მიმართა და უთხრა: „ჩვენ ყველას გვაკისრია პასუხისმგებლობა, დღეს გაკეთებულ განცხადებებში დავგმოთ ირანის თავხედური, მადესტაბილიზებელი ქცევა. მაგრამ, რაც კიდევ უფრო მნიშვნელოვანია, ამისთვის კონკრეტული ნაბიჯები უნდა გადავდგათ”.

„როდესაც ირანი უხეშად ეწინააღმდეგება უშიშროების საბჭოს, უგულებელყოფს მის რეზოლუციებს და ამას შედეგი არ მოჰყვება… ეს ძირს უთხრის გაეროს სანდოობასა და ავტორიტეტს“, - თქვა რობერტ ვუდმა. “ჩვენ უნდა გავაგრძელოთ ირანისთვის პასუხისმგებლობის დაკისრება და გავაგრძელოთ ჩვენი მანდატის შესრულება საერთაშორისო მშვიდობისა და უსაფრთხოების დაწინაურებისთვის”.