តទៅនេះ គឺជាបទវិចារណកថាដែលឆ្លុះបញ្ចាំងអំពីទស្សនៈរបស់រដ្ឋាភិបាលសហរដ្ឋអាមេរិក
លោក John Kerry បេសកជនពិសេសរបស់ប្រធានាធិបតីសហរដ្ឋអាមេរិកទទួលបន្ទុកកិច្ចការអាកាសធាតុ បាននិយាយថា វិធានការម៉ឺងម៉ាត់ជាសេចក្តីត្រូវការជាចាំបាច់នៅពេលបច្ចុប្បន្ននេះដើម្បីដោះស្រាយវិបត្តិអាកាសធាតុ ដោយសារតែ«ភ័ស្តុតាងទាំងអស់កំពុងបង្ហាញប្រាប់យើងថា វាជាការចាំបាច់ដែលយើងត្រូវធ្វើអ្វីៗទាំងអស់ដែលយើងអាចធ្វើបានដើម្បីរក្សាការកើនឡើងសីតុណ្ហភាពផែនដីឱ្យនៅត្រឹម ១,៥ អង្សាសេ»។
លោក Kerry បានថ្លែងដូច្នេះថា៖ «អ្នកវិទ្យាសាស្ត្របានប្រាប់យើងថា អ្វីៗដែលកំពុងកើតឡើងនៅពេលបច្ចុប្បន្ននេះដូចជាការឡើងកម្ដៅផែនដីខ្លាំង ធាតុអាកាសកាន់តែធ្ងន់ធ្ងរជាងមុន គ្រោះអគ្គិភ័យ គ្រោះទឹកជំនន់ ការឡើងកម្ដៅមហាសមុទ្រ ការរលាយផ្ទាំងទឹកកក និងជីវិតដែលរងផលប៉ះពាល់ដ៏អាក្រក់មិនធម្មតាដោយសារវិបត្តិអាកាសធាតុជាដើម គឺនឹងកាន់តែមានសភាពធ្ងន់ធ្ងរជាងនេះទៅទៀត ប្រសិនបើយើងមិនដោះស្រាយវិបត្តិនេះដោយការរួបរួមគ្នានិងតាមវិធីឆ្ពោះទៅមុខទេនោះ»។
លោក Kerry បាននិយាយទៀតថា៖ «មានការវិនិយោគក្នុងបរិមាណយ៉ាងច្រើននៅជុំវិញពិភពលោកដែលធ្វើឡើងតាមវិធីអនុវត្តថ្មីៗ។ ប្រសិនបើយើងធ្វើអ្វីៗតាមវិធីដែលយើងដឹងរួចហើយ ហើយយើងបញ្ចូលបច្ចេកវិទ្យាថ្មីៗមួយចំនួន នោះយើងអាចយកឈ្នះលើការប្រយុទ្ធនេះបាន»។
ផ្នែកសំខាន់មួយនៅក្នុងការយកឈ្នះលើការប្រយុទ្ធនេះគឺការគាំទ្របណ្ដាប្រទេសកំពុងអភិវឌ្ឍន៍និងសហគមន៍ដែលងាយរងគ្រោះឱ្យសម្របទៅតាមនឹងគ្រប់គ្រងផលប៉ះពាល់នៃវិបត្តិអាកាសធាតុ។
លោក Kerry បាននិយាយថា៖ «សហរដ្ឋអាមេរិកគាំទ្រកិច្ចព្រមព្រៀងទីក្រុង Glasgow ស្ដីពីការប្រែប្រួលអាកាសធាតុ ដែលអំពាវនាវឱ្យរួមគ្នាបង្កើនថវិកាសម្រាប់ការសម្របតាមការប្រែប្រួលអាកាសធាតុនេះឱ្យបានទ្វេដងសម្រាប់បណ្ដាប្រទេសកំពុងអភិវឌ្ឍន៍ដែលងាយរងគ្រោះ។ សហរដ្ឋអាមេរិកកំពុងបំពេញតាមកាតព្វកិច្ចរបស់ខ្លួន។ សហរដ្ឋអាមេរិកជាប្រទេសបរិច្ចាគជំនួយមនុស្សធម៌ច្រើនជាងគេបង្អស់នៅលើពិភពលោក។ ប៉ុន្តែ ... លោកប្រធានាធិបតី [Joe] Biden ជឿថា យើងគួរតែធ្វើឱ្យបានច្រើនជាងនេះ»។
លោក Kerry បានបន្ថែមថា៖ «ហេតុដូច្នេះហើយបានជាលោក [ប្រធានាធិបតី Biden] បង្កើតគម្រោង PREPARE ដែលជាផែនការបន្ទាន់របស់លោកប្រធានាធិបតីសម្រាប់ការសម្របតាមនិងភាពធន់ [នឹងការប្រែប្រួលអាកាសធាតុ]»។
លោក Kerry បានបញ្ជាក់ថា នេះជាមូលហេតុដែលលោកប្រធានាធិបតី Biden តាំងចិត្តធ្វើការជាមួយនឹងសភាសហរដ្ឋអាមេរិកដើម្បីផ្ដល់ថវិកាសម្រាប់ការសម្របតាមការប្រែប្រួលអាកាសធាតុចំនួន ៣ ពាន់លានដុល្លារក្នុងមួយឆ្នាំនៅត្រឹមឆ្នាំ ២០២៤ ខាងមុខ ដែលជាការកើនឡើងចំនួន ៦ ដង។
លោក Kerry បានថ្លែងថា៖ «អ្វីដែលអ្នកឃើញកើតឡើងនៅជុំវិញពិភពលោកនៅពេលបច្ចុប្បន្ននេះគឺជារឿងបន្ទាន់ជាក់ស្ដែងជាងពេលណាៗទាំងអស់ដែលយើងចាំបាច់ត្រូវបង្កើនវិធានការនិងធ្វើកិច្ចការនេះឱ្យបានសម្រេច។ គ្មានប្រទេសណាមួយដែលអាចធ្វើព្រងើយកន្ដើយចំពោះកាតព្វកិច្ចរបស់ខ្លួននៅក្នុងការរួមចំណែកថវិកាកម្រិតថ្នាក់ជាតិដែលខ្លួនបានតាំងចិត្តឡើង នៅក្នុងការពង្រឹងកិច្ចការនេះនៅចំណុចណាដែលពួកគេអាចធ្វើបាន និងនៅក្នុងការចូលរួមជាផ្នែកមួយនៃកិច្ចប្រឹងប្រែងនេះបានទេ»៕
