აშშ-ის მთავრობის პოზიცია

სამანტა პაუერი - შეერთებული შტატების საერთაშორისო განვითარების სააგენტოს (USAID ) ადმინისტრატორი ოქტომბერში უკრაინელ ბიზნესმენთა ჯგუფს შეხვდა. მათი შეხვედრა “აი-თი კლასტერის” სახელით ცნობილ, უკრაინის ქ. ლვივის ინოვაციების ცენტრში გაიმართა, რომელსაც მხარს უკრაინის მთავრობა და USAID უჭერენ.

„მართლაც ამაღელვებელია იმის ხილვა, რისი მოწმენიც ლვივის “აი-თი კლასტერში” გავხდით, და ეს არის უკრაინის ეკონომიკის დივერსიფიკაცია“, - თქვა პაუერმა. „ჩემი აზრით, საინფორმაციო ტექნოლოგიების მომსახურების მიმართულებით, ექსპორტის სტაბილური ზრდა მიანიშნებს იმაზე, თუ როგორი მომავალი შეიძლება გააჩნდეს უკრაინას”.

USAID-ის ადმინისტრატორმა კომპანიებს შორის გამოყო “კნოპკის” ინოვაცია და წარმატება, რომელიც უკრაინის “აი-თი კლასტერის” წევრია. მის მიერ შექმნილმა სამედიცინო განგაშის სისტემამ ამ სფეროში გარდატეხა შეიტანა, რადგან ის ენერგიის გამორთვის შემთხვევაშიც წარმატებით ფუნქციონირებს. “კნოპკა” ახლა საქმიან მოლაპარაკებებს შეერთებული შტატებისა და კანადის საავადმყოფოებთან აწარმოებს.

იმის მიუხედავად, რომ რუსეთი უკვე ორწელიწადნახევარზე მეტია ქვეყანაში შეიჭრა და მას ებრძვის, „უკრაინის ბიზნეს-ლიდერები საკუთარ შემოქმედებით უნარებს ტექნოლოგიურ, თუ სხვა სექტორებში ავითარებენ და ქვეყანას მომავლისკენ მტკიცედ მიუძღვებიან. USAID-ში ჩვენ გვქონდა პრივილეგია ყველაფერი გვეღონა იმისთვის, რომ მათთვის მხარი დაგვეჭირა”, - განაცხადა პაუერმა.

SEE ALSO:

რუსეთია უკრაინაში მიმდინარე ომის ერთადერთი მიზეზი

მისი თქმით, შეერთებულმა შტატებმა უკრაინული ბიზნესების მხარდასაჭერად, მათთვის უშუალოდ გამოყო $260 მილიონზე მეტი, რაც მოხმარდა „დაწყებული, ფრონტის ხაზებიდან კომპანიების გაყვანითა და მათი ფუნქციონირების აღდგენით, დამთავრებული - კვალიფიკაციის ამაღლების პროგრამებით, რომლებიც მიზნად ისახავდა უკრაინელთა მაღალმოთხოვნად სფეროებში შექმნილი პროგრამებისთვის გადამზადებას, როგორიცაა მშენებლობა და ტრანსპორტი. ბიზნესებისა და სტარტაპებისთვის ასევე მოხდა ხელმისაწვდომ დაფინანსებაზე ხელმისაწვდომობის გაზრდა. ამ მხარდაჭერამ თავის მხრივ, უკრაინულ კომპანიებს გზა გაუხსნა $232-მილიონის ოდენობის ახალი ინვესტიციებისკენ”.

სამანტა პაუერმა ასევე აღნიშნა, რომ ისინი “პარტნიორებთან ერთად, უკრაინის მთავრობის მხარდამხარ მუშაობენ, რათა მოხდეს გაუმჯობესება გამჭვირვალობისა და სასამართლო სისტემის მეტი დამოუკიდებლობის უზრუნველყოფად… ეს ნდობის მშენებლობისკენ მიმართული კრიტიკული ნაბიჯებია, რაც კონტრაქტების შესრულებას უზრუნველყოფს და საინვესტიციო რეგულაციების დანერგვის შესაძლებლობას იძლევა”.

რუსეთის უკრაინაში შეჭრის შემდეგ, ინოვაცია და გამომგონებლობა ასევე გაიზარდა სოფლის მეურნეობის, წარმოებისა და თავდაცვის სექტორებში. „იმის წარმოდგენაც კი ამაღელვებელია, თუ რისი გაკეთება შეუძლია ამ ქვეყანას და უკრაინელ ხალხს მშვიდობიან დროში“, - განაცხადა პაუერმა და დასძინა:

„იმათი მსგავსი ბიზნესები, რომელთაც მე დღეს შევხვდი, მუშაობენ ისეთი მომავლის მშენებლობაზე, სადაც უკრაინელი ხალხის გამომგონებლობა პროგრესის მომტანი იქნება... აქ შექმნილი პროდუქტებით, მომსახურებითა და იდეებით ისარგებლებენ არამარტო უკრაინაში, არამედ მთელი მსოფლიოს გარშემო, სხვადასხვა ადგილებში”.

2023 წლის 7 ოქტომბერს, „ჰამასმა” ათასობით რაკეტა გაუშვა ისრაელის მიმართულებით. პარალელურად, „ჰამასის” ასობით ტერორისტმა გადაკვეთა ღაზის საზღვარი და ისრაელში მკვლელობის, გაუპატიურებისა და წამების მიზნით შეიჭრა. იმ დღეს ისრაელში 1 200 ადამიანი სასტიკად მოკლეს, მათი უმეტესობა მშვიდობიანი მოსახლეობა იყო; კიდევ 250 მძევლად აიყვანეს და ღაზაში გაიტაცეს. ეს ჰოლოკოსტის შემდეგ, ებრაელი ხალხისთვის ყველაზე მსხვერპლიანი დღე იყო.

„ის, რაც “ჰამასმა” იმ დღეს ჩაიდინა, იყო წმინდა წყლის ბოროტება - ეს იყო სასტიკი და ავადმყოფური რამ“, - თქვა შეერთებული შტატების ვიცე-პრეზიდენტმა კამალა ჰარისმა თავდასხმის ერთი წლისთავთან დაკავშირებით გაკეთებულ განცხადებაში. „და ამან გამოაღვიძა ღრმად დაბუდებული შიში ებრაელ ხალხში, არამარტო ისრაელში, არამედ შეერთებულ შტატებსა და მთელ მსოფლიოში”.

ცალკე გაკეთებულ განცხადებაში, პრეზიდენტმა ჯო ბაიდენმა დაგმო 7 ოქტომბრის შემზარავი თავდასხმა და მისი „ენით გამოუთქმელი სისასტიკე".

SEE ALSO:

ფოკუსი დეესკალაციაზე და ცეცხლის სასწრაფოდ შეწყვეტაზე ახლო აღმოსავლეთში

„მაშინ მე ვუთხარი ისრაელის ხალხს: თქვენ მარტო არ ხართ. ერთი წლის შემდეგ, ვიცე-პრეზიდენტი ჰარისი და მე ვრჩებით ებრაელი ხალხის უსაფრთხოების, ისრაელის უსაფრთხოებისა და მისი არსებობის უფლების ერთგულები“, - განაცხადა პრეზიდენტმა ბაიდენმა. „ჩვენ მხარს ვუჭერთ ისრაელის უფლებას, დაიცვას თავი „ჰეზბოლას”, „ჰამასის”, ჰუთების და ირანის თავდასხმებისგან. გასულ კვირას, ჩემი მითითებით, შეერთებული შტატების სამხედროები კვლავ აქტიურად დაეხმარნენ ისრაელის წარმატებულ თავდაცვას, დაეხმარნენ რა ირანის ბალისტიკური სარაკეტო შეტევის მოგერიებაში”.

პრეზიდენტმა ბაიდენმა აღნიშნა, რომ „7 ოქტომბერი ისტორიაში ასევე შევა, როგორც შავი დღე პალესტინელი ხალხისთვის, იმ კონფლიქტის გამო, რომელიც „ჰამასმა” გააჩაღა. ძალიან ბევრმა მშვიდობიანმა მოქალაქემ გამოიარა დიდი ტანჯვა კონფლიქტის ერთი წლის განმავლობაში - ათობით ათასი დაიღუპა; მსხვერპლის რიცხვი კიდევ უფრო გაიზარდა იმ ტერორისტების გამო, რომლებიც უდანაშაულო ადამიანების ზურგს უკან იმალებოდნენ და მოქმედებდნენ”.

პრეზიდენტმა ბაიდენმა პირობა დადო, რომ შეერთებული შტატები „არ შეაჩერებს მუშაობას ღაზაში ცეცხლის შეწყვეტის შეთანხმების მისაღწევად, რომელიც მძევლებს სახლში დააბრუნებს, ჰუმანიტარული დახმარების გაზრდის საშუალებას მოგვცემს ადგილზე ტანჯვის შესამსუბუქებლად, უზრუნველყოფს ისრაელის უსაფრთხოებასა და ამ ომის დასრულებას. როგორც ისრაელელები, ისე პალესტინელები იმსახურებენ უსაფრთხო, ღირსეულ და მშვიდობიან ცხოვრებას. ჩვენ ასევე კვლავაც გვჯერა კონფლიქტის დიპლომატიური გზით გადაწყვეტის, ისრაელ-ლიბანის სასაზღვრო რეგიონში და გვწამს, რომ ეს არის ერთადერთი გზა ხანგრძლივი სიმშვიდის აღსადგენად, რაც ორივე მხარეს მცხოვრებ ადამიანებს საკუთარ სახლებში უსაფრთხოდ დაბრუნების საშუალებას მისცემს”.

დასასრულს, პრეზიდენტმა ბაიდენმა განცხადებაში კიდევ ერთხელ აღნიშნა, რომ ხსოვნის ამ დღეს “პატივს მივაგებთ ებრაელი ხალხის უდრეკ სულს და ვგლოვობთ 7 ოქტომბრის მსხვერპლს. კურთხეული იყოს მათი ხსოვნა”.