Accessibility links

Breaking News

បទវិចារណកថា៖ ស.រ.អ.​បញ្ជាក់​ជា​ថ្មី​អំពី​សាមគ្គីភាព​ជាមួយ​លោក Navalny និង​ជន​ឯទៀតៗ


រូបឯកសារ៖ ស្ត្រី​ម្នាក់​កាន់​រូបលោក Navalny ដែល​មាន​សំណេរ​ថា «Free Navalny» ដែលប្រែជាភាសាខ្មែរថា «ដោះលែង​លោក Navalny» ក្នុង​ពេល​តវ៉ា​ប្រឆាំង​នឹង​ការចាប់​ខ្លួន​មេដឹកនាំ​បក្ស​ប្រឆាំង​លោក Aleksey Navalny ក្នុង​ក្រុង Tel Aviv នៃ​ប្រទេស​អ៊ីស្រាអែល។

តទៅនេះ គឺ​ជា​បទវិចារណកថា​ដែល​ឆ្លុះ​បញ្ចាំង​ពី​ទស្សនៈ​របស់​រដ្ឋាភិបាល​សហរដ្ឋ​អាមេរិក

មាន​រយៈពេល​ពីរ​ឆ្នាំ​មក​ហើយ​ចាប់​តាំងពី​ពួក​នាយ​ទាហាន​ក្នុង​រដ្ឋាភិបាលរុស្ស៊ីបាន​ប៉ុនប៉ង​ធ្វើ​ឃាត​មេដឹកនាំ​ក្រុមប្រឆាំង​កាន់​លទ្ធិ​ប្រជាធិបតេយ្យ​ លោក Aleksey Navalny ដោយ​ប្រើ​សារធាតុ​ពុល​ធ្វើ​ឱ្យ​ខូច​សរសៃ​ប្រសាទឈ្មោះ Novichok នៅ​លើ​ដែនដី​រុស្ស៊ី។ នៅ​ពេល​លោក​ Navalny បាន​រស់រាន​ជីវិតពីការវាយប្រហារ​យ៉ាង​គឃ្លើន ហើយ​បាន​វិលត្រឡប់​យ៉ាង​ក្លាហាន​ទៅ​កាន់​ប្រទេស​រុស្ស៊ី​វិញក្រោយ​ពី​សុខភាព​របស់​លោក​បាន​ល្អ​ប្រសើរ​ជាង​មុន​នៅ​ឯ​ប្រទេសក្រៅ អាជ្ញាធរ​វិមាន​ក្រឹមឡាំងបានចាប់​លោក​ដាក់​ពន្ធនាគារ​ដោយ​គ្មាន​អៀន​ខ្មាសពី​បទ​ចោទប្រកាន់ទាក់​ទិន​នឹង​នយោបាយ។

លោក Ned Price អ្នកនាំពាក្យ​ក្រសួង​ការបរទេស​ស.រ.អ.«បាន​ថ្កោលទោស​ជា​ថ្មី​ម្ដង​ទៀត​ដល់ការ​ប្រើអាវុធ​គីមីដោយ​ប្រទេស​រុស្ស៊ីក្នុង​ការ​បំពុល​អ្នក​ប្រឆាំង​ខាង​នយោបាយ ហើយ​លោក​បាន​អំពាវនាវ​ដល់វិមាន​ក្រឹមឡាំង​ឱ្យរំលាយ​កម្មវិធី​អាវុធ​គីមីរបស់​ខ្លួន​ចោល​»។

ស.រ.អ.ចូល​រួម​ជាមួយ​ក្រុម​គ្រួសារ​របស់​លោក​ Navalny សហការី និងក្រុម​អ្នកគាំទ្រលោកនៅទូទាំងពិភពលោកក្នុងការ​អំពាវនាវ​ឱ្យមាន​ការ​ដោះលែង​លោក​ជា​បន្ទាន់។​

ក្រុម​សកម្មជន​រុស្ស៊ីឯ​ទៀតៗក៏បាន​រង​គ្រោះ​ដោយ​ជោគ​វាសនាប្រហែលគ្នានេះ​ដែរ។ កាលពីខែ​មេសា ​អាជ្ញាធរ​រុស្ស៊ី​បាន​ចាប់ខ្លួន​លោក​ Vladimir Kara-Murza អ្នកគាំទ្រ​លទ្ធិ​ប្រជាធិបតេយ្យនិង​ជាអ្នក​រិះគន់​ប្រធានាធិបតី​រុស្ស៊ី​លោក Vladimir Putin នៅ​តាម​ដង​ផ្លូវជិត​អគារ​ស្នាក់នៅ​របស់​លោកក្នុង​ទីក្រុង​មូស្គូ។ នៅ​ពេលលោក​ស្ថិត​ក្នុងការ​ឃុំឃាំង​ដោយសារការ​បំពាន​ខាង​រដ្ឋបាលមួយ​ដែលត្រូវ​បាន​គេ​ប្រតិដ្ឋ ​ពួក​គេ​បាន​ចោទ​ប្រកាន់​លោក​ពី​បទ«ផ្សព្វផ្សាយ​ព័ត៌មាន​ក្លែងក្លាយដោយ​ចេតនា​‍»អំពីកង​យោធពល​រុស្ស៊ី។ ​នៅ​ពេល​នេះ​លោក Kara-Murza ​កំពុងស្ថិត​ក្នុងការ​ឃុំឃាំងមុន​ការ​កាត់​ក្តី​ ហើយ​លោក​អាច​ប្រឈម​នឹងទោស​ជាប់ពន្ធនាគាររហូត​ដល់១៥ឆ្នាំ​ប្រសិនបើ​តុលាការ​រក​ឃើញ​ថា ​លោក​មានទោសពៃរ៍។

នេះ​មិនមែន​ជា​លើក​ទី​មួយ​ទេ​ដែល​វិមាន​ក្រឹមឡាំងបាន​ធ្វើទុក្ខបុកម្នេញ​លោក Kara-Murza។ លោក​ត្រូវ​បាន​បំពុល​ចំនួន​ពីរ​ដង​រួច​មក​ហើយ​គឺកាលពី​ឆ្នាំ២០១៥​ និង​ឆ្នាំ២០១៧​ ហើយ​លោក​បាន​ភ្លឹក​បាត់​ស្មារតី​មិន​ដឹង​ខ្លួន។ ការ​ប៉ុនប៉ង​ទាំង​នេះ​មក​លើ​ជីវិត​លោក​ត្រូវ​បាន​យល់​ឃើញជា​ទូទៅ​ថា​ជាការ​ដាក់​ទណ្ឌកម្មរបស់​រដ្ឋាភិបាល​រុស្ស៊ីអំពីកិច្ចការ​របស់​លោក​ស្តីពី​ច្បាប់ Magnitsky ដែលដាក់​ទណ្ឌកម្ម​លើ​ក្រុមអ្នក​រំលោភ​លើ​សិទ្ធិ​មនុស្ស​រុស្ស៊ី។​

ចាប់តាំង​ពី​ចាប់ផ្ដើមបើក​ការ​លុកលុយរបស់​ខ្លួនក្នុងប្រទេស​អ៊ុយក្រែនមក អាជ្ញាធរ​វិមាន​ក្រឹមឡាំង​បាន​បង្កើន​ការ​បង្ក្រាប​លើក្រុម​ប្រឆាំង​និងបណ្តាញ​ព័ត៌មានឯករាជ្យ​ក្នុង​ប្រទេស​រុស្ស៊ី ដោយរួម​មាន​តាមរយៈ​ច្បាប់​ស្តី​ពី​ការ​រឹតត្បិតដែល​មាន​ការ​ដាក់ទោស​ជាប់ពន្ធនាគារ​ផង​ដែរ។ វិមាន​ក្រឹមឡាំងស្វះស្វែង​បញ្ចៀស​ប្រជាជន​រុស្ស៊ី​មិនឱ្យដឹង​អំពី​អំពើ​ហិង្សា​ដែល​កង​កម្លាំង​ខ្លួន​បាន​ធ្វើ​លើ​ជន​ស៊ីវិល​អ៊ុយក្រែន​នោះ​ទេ និង​មិន​ឱ្យជនជាតិ​រុស្ស៊ី​ដឹងអំពី​ចំនួន​ទាហាន​រុស្ស៊ី​ដែល​ស្លាប់​ច្រើន​នាក់​នៅ​ក្នុង​សង្គ្រាម​ដ៏​មិន​ត្រឹមត្រូវ​មួយ​នេះ។

លោក Price បាន​បញ្ជាក់​ជា​ថ្មីអំពី«​សាមគ្គីភាព​របស់​ស.រ.អ.ជាមួយលោក Aleksey Navalny លោក Vladimir Kara-Murza និងអ្នក​ទោស​នយោបាយ​ឯ​ទៀតៗនៅ​ក្នុង​ប្រទេស​រុស្ស៊ី ព្រមទាំងពលរដ្ឋរុស្ស៊ី​ក្លាហានរាប់​ពាន់​នាក់ដែលហ៊ាន​ចេញមុខ​ប្រឆាំង​នឹង​ការកុហករបស់​វិមាន​ក្រឹមឡាំង បើ​ទោះ​ជា​ប្រឈម​មុខ​នឹង​គ្រោះថ្នាក់​ខ្លួន​ឯង​ក៏​ដោយ»៕

Related

XS
SM
MD
LG