ԱՄՆ նախագահ Դոնալդ Թրամփի հայտարարությունը երկրի հարավային սահմանի վերաբերյալ, կարելի է ասել, արդեն տալիս է իր պտուղները։ Միացյալ Նահանգների Ներգաղթի և մաքսային ծառայության աշխատակիցներն ամեն օր ձերբակալում են ագրեսիվ ապօրինի օտարերկրացիների և արտաքսում նրանց հայրենի երկրներ:
ԱՄՆ ներքին անվտանգության նախարար Քրիստի Նոյեմը վերջերս Նյու Յորքում անձամբ էր մասնակցում Ներգաղթի և մաքսային ծառայության աշխատակիցների ստուգայցերին, որից հետո Fox News-ին հետ զրույցում հայտարարեց, թե «հավաքում ենք այս երկրի վատագույն [մարդկանց], որոնք մեր փողոցներն վտանգավոր են դարձնում»:
«[Մենք] բախվեցինք և ձերբակալեցինք Tren de Aragua-ի [հանցավոր խմբավորման] անդամին, պարագլուխներից մեկին։ Նրա նկատմամբ Կոլորադոյում ձերբակալման օրդեր է իջեցված: Փաստորեն, նա նրանցից մեկն էր, որոնց տեսանք տեսանյութում և որոնք գրավել էին [Կոլորադո նահանգի Ավրորա քաղաքի] բազմաբնակարան շենքը ու բռնություններ իրականացրել»:
Ձերբակալվածը Tren de Aragua-ի կամ TdA-ի պարագլուխ Անդերսոն Զամբրանո-Պաչեկոն է, որը հետախուզվում էր Կոլորադոյի Ավրորա քաղաքի մի քանի բնակարանային համալիրների բռնությամբ տիրանալու, առևանգման, գողության և սպառնալիքի համար: Ձերբակալությունը տեղի է ունեցել այն բանից հետո, երբ ԱՄՆ նախագահ Դոնալդ Թրամփը TdA-ն ու MS-13-ը դասակարգեց որպես օտարերկրյա ահաբեկչական կազմակերպություններ, ինչը նշանակում է, որ Միացյալ Նահանգների դաշնային գործակալությունները այլևս իրավասու են այդ ավազակախմբերին վերաբերվել որպես ազգային անվտանգության սպառնալիքի:
Նախարար Նոյեմը ընդգծել է նախագահ Թրամփի դերը՝ Ամերիկան կրկին անվտանգ դարձնելու գործում:
«Եվ դա հենց այն է, ինչ անում ենք: Այս հանցագործ օտարերկրացիների դեմ գիշերային ստուգայցերը հատուկ էին: Նրանց դուրս ենք բերում [թաքստոցներից]։ Բնականաբար, մտադիր ենք ավելի շատ տեղեկություններ ժողովել այնտեղ գտնվող հանցագործների մասին»:
Նախարար Նոյեմի խոսքով՝ ագրեսիվ անօրինական օտարերկրացիները պատասխանատու են, որ ամերիկյան բազամթիվ ընտանիքներ կորցնում են իրենց զավակներին թմրանյութերի և բռնության պատճառով:
«Եվ մենք պատրաստվում ենք նրանց դուրս հանել այստեղից և համոզվել, որ շարունակում ենք այդ գործն անել ու գիտենք, որ ամերիկացի ժողովրդի [ձայնը], իսկապես, լսելի է, և որ այս գործակալները դուրս են գալիս [աշխատանքի]՝ ունենալով անհրաժեշտ աջակցություն և տեղական ինքնակառավարման մարմինների հետ համագործակցություն՝ անելու այն, ինչ պետք է անեն»:
Պետքարտուղար Նոեմը խոստացել է «շարունակել վտանգավոր հանցագործների վտարումն այս երկրից: ...Երբ ձեզ գտնենք, հետևանքներ կլինեն, և ձեզ [պարզապես] կհեռացնենք»։
Սույն խմբագրականն արտացոլում է Միացյալ Նահանգների կառավարության տեսակետը։
