აშშ-ის მთავრობის პოზიცია

ამერიკის პრეზიდენტმა დონალდ ტრამპმა განაცხადა, რომ უკვე დაწყებულია შეერთებული შტატების ძალისხმევა, რუსეთსა და უკრაინას შორის სამშვიდობო შეთანხმების მიღწევის უზრუნველსაყოფად.

„მისი [ომის] დასრულება ძალზე მნიშვნელოვანია. ეს აბსოლუტური სასაკლაოა… მეორე მსოფლიო ომის შემდეგ მსგავსი არავის არაფერი უნახავს“.

პრეზიდენტ ტრამპის თქმით, რუსეთის პრეზიდენტ ვლადიმირ პუტინს მასთან საუბარი სურს და რომ ორ მამაკაცს შორის „საუბარი მალე შედგება“. შეერთებული შტატების პრეზიდენმა იქვე აღნიშნა, რომ უკრაინის პრეზიდენტ ვოლოდიმირ ზელენსკის ის ბევრჯერ ესაუბრა და „მათ მშვიდობის ხილვა სურთ“.

უკრაინაში მიმდინარე ომის დასრულების საქმეში ხელშეწყობა სხვა ქვეყნებსაც შეუძლიათ, როგორიცაა მაგალითად, ჩინეთი და საუდის არაბეთი, განაცხადა პრეზიდენტმა ტრამპმა. მისი თქმით, ჩინეთი რუსეთის ძალიან დიდი სავაჭრო პარტნიორია და “ვფიქრობ, მათ [ჩინელებს] რუსეთზე დიდი გავლენა აქვთ”.

SEE ALSO:

რუსეთის სახიფათო თამაში და თვალთმაქცობა

შეერთებული შტატების პრეზიდენტმა საუდის არაბეთსა და ოპეკის სახელით ცნობილ, ნავთობის ექსპორტიორ ქვეყანათა ორგანიზაციას (OPEC) მოუწოდა, ნავთობზე ფასები დაწიონ.

„ფასები თუ შემცირდა, რუსეთ-უკრაინის ომი მაშინვე დასრულდება. ახლა ფასი საკმაოდ მაღალია, რაც ომის გაგრძელებას უწყობს ხელს“, - განაცხადა მან.

პრეზიდენტი ტრამპი იმეორებს, რომ მისი პრეზიდენტობის შემთხვევაში, ვლადიმირ პუტინი უკრაინაში არ შეიჭრებოდა, იმის მიუხედავად, რომ უკრაინა „პუტინის თვალის ჩინი“ იყო. ტრამპის თქმით, პუტინი „არცთუ სახარბიელო პოზიციაშია. ის მას [უკრაინას] ხორცის საკეპ მანქანაში ატარებს, მაგრამ უმეტესობას ეგონა, რომ ომი დაახლოებით ერთ კვირაში დამთავრდებოდა. ახლა კი სამი წელი გავიდა, არა? ასე რომ... ის არ შეიძლება აღფრთოვანებული იყოს“.

შეერთებული შტატების პრეზიდენტმა წუხილი გამოთქვა უკრაინაში მომხდარ უბედურებასთან და ქვეყნის განადგურებასთან დაკავშირებით:

„ახლა თქვენ წინაშეა ყველა ეს დაბომბილი ქალაქი, სადაც ადამიანები დაიღუპნენ. ისინი შენობათა მიზანმიმართული ნგრევის ადგილებს ჰგავს. ვფიქრობ, აღმოჩნდება, რომ უკრაინაში და უკრაინის ომში იმაზე გაცილებით მეტი ადამიანი დაიღუპა, ვიდრე ამას წარმოვიდგენდით… უყურებ რა ბრძოლის ველის იმ სურათებს, რაც მე ვნახე და რისი ხილვაც არავის სურს და ფიქრობ: ვერასდროს იქნები იგივე ადამიანი”.

პრეზიდენტმა ტრამპმა თავის სოციალურ ქსელზე Truth Social რუსეთის პრეზიდენტ ვლადიმირ პუტინს მოუწოდა: „შეთანხმდით ახლა და შეაჩერეთ ეს აბსურდული ომი. თუ ‘გარიგებას’ ვერ მივაღწევთ, და თანაც მალევე, სხვა გზა აღარ დამრჩება იმის გარდა, რომ დავაწესო მაღალი დონის გადასახადები, ტარიფები და სანქციები რუსეთის მიერ შეერთებულ შტატებსა და სხვა მონაწილე ქვეყნებზე გაყიდულ ყველანაირ საქონელზე... შეთანხმების დრო დადგა. [ომს] მეტი სიცოცხლე აღარ უნდა შეეწიროს”!!!

21 იანვარს მარკო რუბიომ ფიცი საზეიმოდ დადო და მუშაობას შეერთებული შტატების 72-ე სახელმწიფო მდივნად შეუდგა.

ცოტა ხნით ადრე, მის ამ პოსტზე დასამტკიცებლად გამართულ მოსმენაზე, მომავალმა სახელმწიფო მდივანმა ამერიკელ სენატორებს შეერთებული შტატების საგარეო პოლიტიკაზე საკუთარი ხედვა გააცნო.

რუბიოს თქმით, ცივი ომის დასასრულს შეიქმნა არასწორი კონსენსუსი, თითქოს ამერიკის ეროვნული ინტერესების ჩანაცვლება შესაძლებელი იყო ისეთით, რომელიც ლიბერალურ მსოფლიო წესრიგს ემსახურებოდა.

„ეს მხოლოდ ფანტაზია არ გახლდათ. ახლა ჩვენ ვიცით, რომ ეს იყო სახიფათო ილუზია”, - განაცხადა რუბიომ სენატის საგარეო საქმეთა კომიტეტში გამართულ მოსმენაზე.

SEE ALSO:

ამერიკის უსაფრთხოების წინაშე არსებული ყველაზე გადაუდებელი საფრთხეები

მისი თქმით, შეერთებული შტატების სამრეწველო შესაძლებლობა ჩამოიშალა; მომარაგების კრიტიკულმა ჯაჭვებმა მოწინააღმდეგეთა ხელში გადაინაცვლა; მასობრივმა მიგრაციამ საფრთხე შეუქმნა საზოგადოებათა და მთავრობათა სტაბილურობას. რუბიოს განცხადებით, მიუხედავად იმისა, რომ შეერთებული შტატები ”ძალიან ხშირად გლობალურ წესრიგს უფრო მაღლა აყენებდა, ვიდრე ჩვენს მთავარ ეროვნულ ინტერესებს, სხვა ერები... მანიპულირებდნენ ამით, რათა ეს ჩვენი ინტერესების ხარჯზე, საკუთარი ინტერესების სასარგებლოდ გამოეყენებინათ”.

”ჩვენ მივესალმეთ ჩინეთის კომუნისტურ პარტიას გლობალურ დღის წესრიგში და მათ ისარგებლეს რა ყველა მისი უპირატესობით, უგულებელყვეს ყველა მისი ვალდებულება და პასუხისმგებლობა,” - განაცხადა რუბიომ. „ნარკოტერორისტები, დიქტატორები და დესპოტები სარგებლობენ გახსნილი საზღვრებით, რათა ხელი შეუწყონ ქალებითა და ბავშვებით ვაჭრობისკენ მიმართულ მასობრივ მიგრაციას და ჩვენი საზოგადოების დატბორვას მომაკვდინებელი “ფენტანილითა” და ძალადობრივი დამნაშავეებით. დიქტატორები მოსკოვში, თეირანში, ფხენიანში - თაღლით სახელმწიფოებში - ახლა ქაოსსა და არასტაბილურობას თესავენ... და შემდეგ კი იმალებიან გაერთიანებული ერების ორგანიზაციის უშიშროების საბჭოში ვეტოს უფლების, ან ბირთვული ომის მუქარების უკან”.

რუბიოს თქმით, იმისთვის, რომ ამჟამინდელ გეოპოლიტიკურ არასტაბილურობას გავუმკლავდეთ, საჭიროა ამერიკის შეერთებული შტატები, რომელიც „ძლიერი და თავდაჯერებულია... რომელიც ჩართულია მსოფლიოს საერთაშორისო ურთიერთობებში და რომელიც კიდევ ერთხელ, ჩვენს მთავარ ეროვნულ ინტერესებს ყველაფერზე მაღლა აყენებს“.

დღეს უკვე შეერთებული შტატების სახელმწიფო მდივანმა ჯერ კიდევ ოთხი წლის წინ აღნიშნა, რომ „ამერიკის სიძლიერე ჩვენი მოწინააღმდეგეებისთვის შემაკავებელი იყო და რომ ამან დიპლომატიაში ბერკეტები მოგვცა“.

“ახლა კი, ტრაგიკულად,” - აცხადებს ის, ”შემაძრწუნებელი სისასტიკით ჩადენილ დანაშაულსა და წარმოუდგენელ ადამიანურ ტანჯვას პრაქტიკულად ყველა კონტინენტზე შეხვდებით”. რუბიოს თქმით, იმის გამო, რომ შეერთებული შტატები დაფუძნდა „რევოლუციურ ჭეშმარიტებაზე“, რომ ყველა ადამიანი თანაბრადაა შექმნილი და მათ ღვთით მინიჭებული უფლებები აქვთ, „ჩვენ არასდროს ვიქნებით გულგრილნი ჩვენი თანამემამულეების ტანჯვის მიმართ“. ამ ყველაფრის ფონზე, “საბოლოო ჯამში, პრეზიდენტ ტრამპის მმართველობის დროს, შეერთებული შტატების სახელმწიფო დეპარტამენტის მთავარი პრიორიტეტი იქნება შეერთებული შტატები”, - აცხადებს ის.

”ბოლოს და ბოლოს,” განაცხადა რუბიომ, ”როგორ შეძლებს ამერიკა დედამიწაზე მშვიდობის დამყარების ხელშეწყობას, თუკი ის შინ თავად არ იქნა უსაფრთხოდ? რა სარგებლობას მოუტანს ამერიკა ჩვენს მოკავშირეებს, თუკი ის თვითონ არ იქნება ძლიერი? და როგორ შეძლებს ამერიკა ღვთის შვილთა ტანჯვის დასრულებას მთელ მსოფლიოში, თუკი ის საკუთარ სახლში არ იქნა აყვავებული”?